विजेवर धावणारी वाहने ( ई- वाहने) खरेदी करण्याच्या धोरणाअंतर्गत महापालिकेने मोठा गाजावाजा करून अधिका-यांसाठी भाडेतत्वावर घेतलेल्या मोटारींचा चार्जिंगसाठी ३५ किलोमीटरचा प्रवास होत आहे. व्यवस्था नसल्याने मोटारी चार्जिंगसाठी भोसरीत न्याव्या लागत असल्यामुळे या मोटारींचा वापरही अल्प होत असल्याचे स्पष्ट झाले आहे. पर्यावरणपूरक वाहनांना प्रोत्साहन देण्याच्या उद्देशाने महापालिकेने अधिकारी वर्गासाठी वीजेवर धावणाऱ्या ३६ मोटारी भाडेतत्वावर घेण्यास मान्यता दिली आहे. पहिल्या टप्प्यात यातील आठ मोटारी महापालिकेच्या वाहन ताफ्यात दाखल झाल्या आहेत. सहाय्यक आयुक्त दर्जाच्या अधिकाऱ्यांनी या मोटारींचा वापर सुरू केला असला तरी चार्जिंग व्यवस्थे अभावी अनेकदा त्यांचा वापर करणे अडचणीचे ठरत आहे. चार्जिंगसाठी न्याव्या लागत असल्याने त्या नेण्यास टाळाटाळ - मोटारींचा वापर सुरू झाला असला तरी चार्जिंग व्यवस्था नसल्याने मोटारी भोसरी येथील एमआयडीसीतील खासगी चार्जिंग स्थानकावर न्याव्या लागत आहेत. हा प्रवास साधारपणे ३५ किलोमीटरचा आहे. महापालिकेचे कामकाज संपल्यानंतर सायंकाळी चालकांना मोटारी चार्जिंगसाठी न्याव्या लागत असल्याने त्या नेण्यास टाळाटाळ होत आहे. महापालिका ज्यावेळी स्वत: वाहने खरेदी करेल त्यावेळी महापालिकेची चार्जिंग व्यवस्था - दरम्यान, भाडेतत्वावर मोटारी घेण्यात आल्या आहेत. त्यामुळे चार्जिंग व्यवस्था उपलब्ध करून देण्याची जबाबदारी संबंधित कंपनीची आहे. महापालिका ज्यावेळी स्वत: वाहने खरेदी करेल त्यावेळी महापालिकेची चार्जिंग व्यवस्था उभारण्यात येईल, असा दावा महापालिकेच्या अधिकाऱ्यांकडून करण्यात आला आहे.