पुण्यातील सिंहगड रस्त्यावरील हिंगणे खुर्द येथील विहिरीत महापालिकेच्या एका सेवानिवृत्त कर्मचाऱ्याने उडी मारून आत्महत्या केल्याची घटना घडली आहे. आज (सोमवार) सायंकाळी साडेचार वाजण्याच्या सुमारास हा प्रकार घडला. या घटनेचा अधिक तपास सिंहगड पोलिस करत आहेत. रोहिदास आरेकर (वय ६१) असे मृत सेवानिवृत्त कर्मचाऱ्याचे नाव आहे. पोलिसांनी दिलेल्या माहितीनुसार, रोहिदास आरेकर यांना सिंहगड रस्त्यावरील हिंगणे खुर्द येथील विहिरीमध्ये उडी मारताना काही नागरिकांनी पाहिले. त्यांनी लगेच अग्निशामक दल व पोलिसांना याची माहिती दिली. आरेकर यांना विहिरीतून काढण्यापूर्वीच त्यांचा बुडून मृत्यू झाला. काही वेळाने अग्निशामक दलाच्या कर्मचाऱ्यांनी विहिरीतून आरेकर यांचा मृतदेह बाहेर काढला. आरेकरांच्या आत्महत्या कारण समजू शकलेले नाही. सिंहगड पोलिसांकडून तपास सुरू आहे.
