किती वर्षे चांगले काम करते यावर हे सरकार टिकेल – अजित पवार

दादा म्हणाले..
खराब हवामानामुळे बैठकीला गेलो नाही
मराठा आरक्षणाबाबत मुख्यमंत्र्यांनी शनिवारी सकाळी बोलावलेल्या बैठकीत मी उपस्थित राहणार होतो. मात्र, खराब हवामानामुळे प्रवास रद्द करावा लागला. त्यामुळे बैठकीत जाऊ शकलो नाही. हे आरक्षण आम्ही फार विचारपूर्वक दिले होते. त्यासाठी सर्व खबरदारी घेतली होती. राज्य शासनाने आता चांगल्यात चांगले वकील देऊन सर्वोच्च न्यायालयात बाजू मांडावी. त्या आरक्षणाची अंमलबजावणी झाली पाहिजे, ही आमची आग्रही मागणी आहे.
जी काही चौकशी करायची ती करा
भ्रष्टाचाराचे आमच्यावर खूप आरोप झाले; पण कुठे भ्रष्टाचार दिसला? कोणती कागदपत्रे दिसली? त्यासाठी चौकशी समितीही नेमली गेली. तरीही काही दोष आढळला नाही. मी इतके दिवस या विषयावर बोलत नव्हतो; पण कोणाला काय चौकशा करायच्या आहेत त्या करा. उगीचच प्रत्येक वेळी हा विषय काढला जात आहे.
चांगल्या निर्णयात सरकारला पाठिंबाच; पण सत्तेत नाही
राज्यात आम्ही सरकारला स्थैर्यासाठी पाठिंबा दिला आहे; पण आम्ही सत्तेत सामील होण्याची स्थिती अजिबात नाही. सततच्या निवडणुका कोणालाच परवडणाऱ्या नाहीत आणि त्या कोणालाही नको असतात. त्यामुळे सरकार जनतेच्या हिताचे जे निर्णय घेईल त्याला आमचा पाठिंबा असेल आणि जनतेच्या विरोधात काही निर्णय रेटून नेण्याचा प्रयत्न झाल्यास त्याला आम्ही विरोध करू. किती वर्षे सरकार चांगले काम करते यावर ते किती वर्षे टिकेल हे ठरेल.