ठाणे जिल्ह्यात एकेकाळी दहशत माजविणाऱ्या सुरेश मंचेकर टोळीचे पुनरूज्जीवन करण्याचा प्रयत्न करणाऱ्या विठ्ठल नवघरे या ३३ वर्षीय गुंडाची हत्या करून त्याचा मृतदेह डोंबिवलीतील एका नाल्यात फेकलेल्या अवस्थेत आढळून आल्याने गुन्हेगारी वर्तुळात एकच खळबळ उडाली. डोंबिवली पूर्वेकडील एमआयडीसी परिसरातील फेज - १ मधील बॉम्बे डाईंग कंपनी जवळ बुधवारी सकाळच्या सुमारास एका अज्ञात इसमाचा मृतदेह आढळून आला. या मृतदेहाच्या पोटावर भोसकून धारदार शस्त्राने वार केल्याचे दिसून आले. या घटनेची माहिती मिळताच मानपाडा पोलिसांनी तात्काळ घटनास्थळी जाऊन मृतदेह ताब्यात घेतला. हा मृतदेह नंतर उत्तरीय तपासणीकरिता पालिकेच्या रूख्मिणीबाई हॉस्पिटलमध्ये पाठविण्यात आला. एकीकडे पोलीस ओळख पटविण्याच्या दिशेने तपास करत असतानाच या मृतदेहाचा ताबा घेण्यासाठी त्याचे नातेवाईक हॉस्पिटलमध्ये दाखल झाले. हा मृतदेह मंचेकर टोळीचा गुंड विठ्ठल नवघरे असल्याची खात्री पटली. उत्तरीय तपासणी झाल्यानंतर नवघरे बंधूंनी विठ्ठलचा मृतदेह ताब्यात घेतला. विठ्ठलवर त्याच्या मूळ गावी वाशीम जिल्ह्याच्या मंगरूळपीर तालुक्यातील जनुना येथे अंत्यसंस्कार करणार असल्याचे नातलगांनी सांगितले.