ठाणे : ठाणे जिल्ह्यात गेल्या काही दिवसांपासून व्यवस्थित सुरू असलेल्या ४५ वर्षांवरील वयोगटातील नागरिकांच्या लसीकरण मोहिमेत पुन्हा खंड पडण्याची शक्यता आहे. जिल्हा प्रशासनाकडून मिळालेल्या माहितीनुसार ठाणे जिल्ह्यात सध्या ६७ हजार १५० लशींचा साठा शिल्लक आहे. हा साठा दोन ते तीन दिवस पुरेल इतकाच आहे, अशी माहिती प्रशासनातील एका वरिष्ठ अधिकाऱ्याने दिली. ठाणे महापालिका क्षेत्रात लसीकरणासाठी एकूण ५५ केंद्रे आहेत. त्यापैकी शुक्रवारी ३१ केंद्रे सुरू ठेवण्यात आली होती. तर, कल्याण - डोंबिवली शहरातील सर्व १७ लसीकरण केंद्रे शुक्रवारी सुरू होती. प्रत्येक केंद्रांवर दिवसाला २५० ते ३५० नागरिकांना लस देण्यात येत आहे. या शहरात एक दिवस पुरेल इतकाच लशींचा साठा शुक्रवारी शिल्लक होता. ठाणे जिल्ह्य़ाला शुक्रवारी सकाळी २३ हजार ३८० लशींचा साठा प्राप्त झाला आहे. त्यामध्ये २१ हजार कोव्हिशिल्ड आणि २ हजार ३८० कोव्हॅक्सिनचा समावेश आहे. त्यामुळे जिल्ह्य़ाकडे सध्या ७८ हजार ११० कोव्हिशिल्ड आणि १२ हजार ४२० कोव्हॅक्सिनचा साठा उपलब्ध आहे. हा साठा दोन ते तीन दिवस पुरेल इतकाच आहे. ठाणे जिल्ह्य़ातील लशींचा साठा शहर कोव्हिशिल्ड कोव्हॅक्सिन एकूण ठाणे १०२५० १६० १०४१० कल्याण - डोंबिवली ९०८० ४४२० १३५०० उल्हासनगर ३४६० १६७० ५१३० भिवंडी ११०९० १०६० १२१५० मीरा भाईंदर ६३४० २०९० ८४३० नवी मुंबई ५३६० - ५३६० ठाणे ग्रामीण ११५३० ६४० १२१७० एकूण ५७११० १००४० ६७१५०
