विरार : वसई विरार शहरात शनिवारी ४ नवीन रुग्ण आढळले असून एकूण संख्या १३ एवढी झाली आहे. यातील तीन तरुण हे अमेरिकेतून परतले होते तर चौथा तरुण मुंबईच्या पंचतारांकित हॉटेलातील कर्मचारी आहे. वसई पश्चिमेच्या गास गावातील ५ मित्र अमेरिकेहून परतले होते. यातील एक तरुण पुण्याला गेला होता. या सर्वाना अलगीकरणात ठेवण्यात आले होते. पुण्यात गेलेला तरुण पॉझिटिव्ह निघाल्यानंतर सर्वांची तपासणी करण्यात आली. त्यातील ३ जणांना कोरोनाची लागण झाल्याचे शनिवारी संध्याकाळी स्पष्ट झाले. सध्या या रुग्णांना बोळींज येथील विलगीकरण कक्षात ठेवण्यात आले असून त्यांच्यावर उपचार सुरु आहेत. ते तीनही रुग्ण २८ ते ३५ च्या वयोगटातील आहेत. तर प्रशासनाने राजोडी परिसर पूर्णतः बंद केला आहे. तर चौथा रुग्ण हा महापालिका क्षेत्रात सापडला असून तो मुंबईच्या एका पंचतारांकित हॉटेल मधील कर्मचारी आहे. तो नालासोपारा पश्चिम येथे राहत असून सध्या त्याला बोळींज येथील रुग्णालयात उपचारासाठी दाखल करण्यात आले आहे. त्याच्या कुटुंबियांना अलगीकरणात ठेवण्यात आले आहे. सध्या तो कुणाच्या संपर्कात आला याचा तपास सुरु असल्याची माहिती पालिका आरोग्य विभागाने दिली आहे.
