कुत्र्यासोबत फोटोशूट करणं १७ वर्षीय तरुणीला चांगलंच महागात पडलं. मित्राच्या कुत्र्यासोबत फोटोशूट करत असताना लारा सॅन्सन नावाच्या तरुणीवर कुत्र्याने हल्ला चढवला. कुत्र्याने तरुणीच्या चेहऱ्यावरच जोरदार हल्ला चढवला आणि या हल्ल्यानंतर तिच्या चेहऱ्यावर तब्बल ४० टाके पडले. जर्मन शेफर्ड जातीचा हा कुत्रा होता. कॅमेरासमोरच ही घटना घडल्याने याचे बरेच फोटो कॅमेऱ्यात कैद झाले. घटनेनंतर दिलेल्या एका मुलाखतीत लारा म्हणाली, "मला वाटत की मी त्या कुत्र्याला चुकीच्या पद्धतीने स्पर्श केला. मी त्याच्या गळ्यात हात घालून फोटो काढण्यासाठी पोझ दिली आणि तो संतापला. जेव्हा त्याने चावा घेतला तेव्हा मला फार त्रास झाला नाही, वेदना जाणवल्या नाहीत. पण नंतर त्याची जाणीव झाली." कुत्र्याने लाराच्या चेहऱ्याचा चावा घेतल्याने तिचा चेहरा विद्रूप झाला आहे. जवळपास दोन तास तिच्यावर शस्त्रक्रिया सुरू होती. लाराच्या डोळ्याजवळ आणि तोंडाजवळ ४० टाके पडले. शस्त्रक्रियेनंतरचे काही फोटो लाराने स्वत: तिच्या सोशल मीडिया अकाऊंटवर पोस्ट केले.
