UPSC IAS interview question: केंद्रीय लोकसेवा आयोगाची (यूपीएससी) परीक्षा देशातील सर्वाधिक कठीण परीक्षांपैकी एक मानली जाते. या परीक्षेचा इंटरव्ह्यू साधारण २० ते २५ मिनिटांचा असतो. आयएएस अधिकारी बनण्यासाठी उमेदवार खरंच पात्र आहे की नाही, हे पडताळण्यासाठी असे काही प्रश्न विचारले जातात की उमेदवारांचा चांगलाच गोंधळ उडतो, ते संभ्रमावस्थेत जातात. काय उत्तर द्यावं हेच त्यांना समजत नाही. आपलं पुस्तक 'द स्टील फ्रेम: अ हिस्ट्री ऑफ आयएएस' बाबत दिलेल्या एका मुलाखतीत यूपीएससीच्या कठीण प्रश्नांचं उदाहरण देताना यूपीएससीचे माजी चेअरमन दीपक गुप्ता यांनी अशाच एका इंटरव्ह्यूची आठवण सांगितली. चेअरमन दीपक गुप्ता यांनी एक जुनी आठवण सांगताना, एकदा इंटरव्ह्यू बोर्डाच्या सदस्याने उमेदवाराला तुम्ही इतके बारीक किंवा लुकडे का आहात असा प्रश्न विचारल्याचं सांगितलं. "त्या उमेदवाराला Why are you so Lean and Thin? ( तुम्ही इतके लुकडे का आहात? ) असा प्रश्न विचारण्यात आला होता. त्यावर उमेदवाराने - Sir, IAS is not joke and Allahabad University is not sanatorium ( सर, आयएएस म्हणजे काही विनोद नाहीये आणि अलाहाबाद युनिव्हर्सिटी म्हणजे काही रुग्णांना ठणठणीत होईपर्यंत ठेवण्याची जागा नाही) असं उत्तर दिलं". उमेदवाराच्या उत्तराने बोर्डाचे सदस्य चांगलेच प्रभावित झाले असंही गुप्ता यांनी सांगितलं. गुप्ता पुढे म्हणाले की, "अशाप्रकारे तुमच्या व्यक्तीमत्त्वातील प्रामाणिकपणाची झलक दिसायला हवी. तुम्हाला तुमचं म्हणणं किंवा भूमिका मुद्देसुदपणे मांडता यायला हवी, कारण भविष्यात तुम्हाला खूप मोठी जबाबदारी पार पाडायची आहे".
