Pune: नारायण राणेंच्या शंकराचार्यांबद्दलच्या वक्तव्यानंतर काँग्रेस आक्रमक!, बालगंधर्व चौकात निदर्शने
अयोध्येतील राम मंदिर सोहळ्याला चार शंकराचार्यांनी उपस्थित राहण्यास नकार दिला आहे. त्यातच दुसरीकडे “शंकराचार्यांनी हिंदू धर्मासाठी दिलेलं योगदान सांगावं” असं विधान भाजपाचे नेते आणि केंद्रीय मंत्री नारायण राणे यांनी केले आहे. त्यावरून विरोधक आक्रमक झाले असून आज (१४ जानेवारी) पुण्यातील बालगंधर्व रंगमंदिर चौकात काँग्रेस पक्षाचे अध्यक्ष अरविंद शिंदे यांच्या नेतृत्त्वाखाली आंदोलन करण्यात आले. काँग्रेस कार्यकर्त्यांनी हातामध्ये कोंबडी घेऊन नारायण राणे विरोधात जोरदार घोषणाबाजी देखील केली. यावेळी आमदार रविंद्र धंगेकर,अभय छाजेड, गोपाळ तिवारी यांच्यासह आजी माजी पदाधिकारी उपस्थित होते.
