मतदानाचा दिवस जसजसा जवळ येत आहे, तसतसे रोकड सापडण्याचे प्रकार समोर येत असताना आता प्रचारासाठी माणसं भाड्याने आणल्याचेही उघडकीस आले आहे.गोंदियामध्ये काँग्रेस अध्यक्ष सोनिया गांधी यांच्या सभेला गर्दी जमवण्यासाठी प्रत्येक महिलेला १०० रु. चे आमिष देऊन बोलवण्यात आले होते. मात्र, पैसे देण्याच्या वेळी 'ठेंगा' दाखवण्यात आल्याने संतप्त झालेल्या तब्बल तीन हजार महिलांनी काँग्रेसच्या गडचिरोली विधानसभा मतदार संघाच्या उमेदवार सगुना तलांडी यांच्या प्रचार कार्यालयासमोरच ठीय्या आंदोलन सुरू केले आहे. तलांडी यांनीच या महिलांना पैसे देऊन प्रचारासाठी आणल्याचे समजते. या महिलांचा जमाव पाहून कार्यालयातील काँग्रेसच्या कार्यकर्त्यांनी पळ काढला असून या सर्व प्रकारामुळे काँग्रेसच्या सगुना तलांडी अडचणीत सापडण्याची शक्यता आहे.
