इंडिका मोटारीची जबरदस्त धडक बसल्याने रिक्षा उलटून झालेल्या भीषण अपघातात रिक्षातून प्रवास करणारा हर्षवर्धन कुंभार (६) हा लहान मुलगा मरण पावला. हा अपघात भांडुप येथील गुरुनानक शाळेजवळच्या रस्त्यावर घडला. रविवारी दुपारी साडेबाराच्या सुमारास अशोक कुंभार (४०) आणि सुनीता कुंभार (३४) हे आपला मुलगा हर्षवर्धन (६) याच्यासह भांडुप रेल्वेस्थानकाजवळ रिक्षा पकडून नातेवाईकाच्या घरी निघाले होते. तुळशेतपाडा येथे निघाले असताना त्यांच्या रिक्षाला विरुद्ध दिशेने येणाऱ्या इंडिका मोटारीची जबरदस्त धडक बसली. त्या धडकेने रिक्षा उलटली. या अपघातात हर्षवर्धन कुंभार हा सहा वर्षांचा मुलगा जबर जखमी झाला. त्याला रुग्णालयात दाखल केले असता तेथे तो मरण पावल्याची माहिती पोलिसांनी दिली. रिक्षाचालक हेमराज गजबले (२७) याच्यासह कुंभार दाम्पत्य किरकोळ जखमी झाले.
