भाजप नेते रमेश कराड यांच्या पुढाकाराने केज तालुक्यातील देवगाव फाटा येथे ११७ कोटी खर्चून माउली शुगर हा साडेतीन हजार टन गाळप क्षमतेचा व १४ मेगावॉट वीजनिर्मितीचा कारखाना जूनपासून उभारला जाणार आहे. भाजप नेते खासदार गोपीनाथ मुंडे यांच्या मार्गदर्शनाखाली कारखान्याची उभारणी होणार आहे.रेणापूर तालुक्यातील कारेपूर येथे आयोजित मेळाव्यात कराड यांनी ही माहिती दिली. माजी आमदार बब्रुवान खंदाडे, टी. पी. कांबळे, प्रदेश प्रवक्ते गणेश हाके, ओमप्रकाश गोडभरले, अॅड. सुरेंद्र घोडजकर आदी उपस्थित होते. परिसरातील ऊस उत्पादकांची गरसोय दूर करण्यासाठी नव्या कारखान्याची उभारणी केली जाणार आहे. येत्या जूनपासून प्रकल्पाला सुरुवात होईल. दवणगावचे सरपंच डॉ. बाबासाहेब घुले यांचा यशवंत पंचायतराज योजनेत दवणगावचा पहिला क्रमांक आल्याबद्दल या वेळी सत्कार करण्यात आला. राष्ट्रवादी काँग्रेस व काँग्रेसच्या अनेक कार्यकर्त्यांनी कराड यांच्या उपस्थितीत या वेळी भाजपमध्ये प्रवेश घेतला.