बार्शी येथे दोन महिलांच्या गळय़ातील दोन लाख रुपये किमतीचे आठ तोळे सोन्याचे दोन गंठण ‘धूम’ टोळीने हिसका मारून पळवून नेले. मोटारसायकलवरून भरधाव वेगात येऊन महिलांच्या गळय़ातील किमती दागिने लांबविण्याचे प्रकार वरचे वर वाढत असून हे लोण आता ग्रामीण भागातही पोहोचले आहे. बार्शी येथे कोठारे इमारतीसमोर मीना शहाजी पवार (वय ४०, रा. कसबा पेठ, बार्शी) या रस्त्यावरून पायी एकटय़ा चालत जात असताना दोघा अज्ञात चोरटय़ांनी काळय़ा रंगाच्या मोटारसायकलवरून येऊन त्यांच्या गळय़ातील चार तोळे वजनाचे दोन सोन्याचे गंठण हिसका मारून चोरून नेले. याशिवाय शीतल अभिमन्यू सातपुते (रा. ढगे मळा, बार्शी) यांच्या गळय़ातील चार तोळे वजनाचे सोन्याचे गंठण या‘धूम टोळीने हिसका मारून पळवून नेले. या गुन्हय़ाची नोंद बार्शी पोलीस ठाण्यात झाली आहे.