अरविंद केजरीवालप्रणीत आम आदमी पार्टीचे राष्ट्रीय संस्थापक-सदस्य डॉ. गिरधर पाटील (जळगाव), गजानन खातू (मुंबई) व किरण उपकारे (अहमदनगर) ही श्रेष्ठ मंडळी येत्या शनिवारी, ५ जानेवारी रोजी सोलापूरच्या भेटीवर येत आहेत. त्यांच्या उपस्थितीत पक्षाच्या कार्यकर्त्यांची बैठक आयोजित करण्यात आली आहे. ही बैठक शनिवारी दुपारी तीन वाजता सरस्वती चौकातील पक्षाचे संस्थापक-सदस्य विद्याधर दोशी यांच्या ‘जीवनतारा’ बंगल्यात आयोजित करण्यात आली आहे. यावेळी पक्षश्रेष्ठींचे ‘राजकारणातून व्यवस्था परिवर्तन’ या विषयावर पक्षाची भूमिका स्पष्ट करणार आहेत. याचवेळी सोलापूर शहर व जिल्ह्य़ासह तालुका स्तरावरील पक्ष शाखा उभारण्यासाठी रूपरेषा निश्चित केली जाणार आहे. या बैठकीस पक्षात कार्य करू इच्छिणाऱ्या व्यक्तींनी परिचयपत्रासह उपस्थित राहावे असे आवाहन संयोजक विद्याधर दोशी यांनी केले आहे.