तेलगू चित्रपटातील युवा अभिनेता आणि नृत्यूदिग्दर्शक के. विजय याचा नेपाळच्या भूकंपात दुर्देवी मृत्यू झाल्याची माहिती समोर आली आहे. आपल्या आगामी चित्रपटाच्या चित्रीकरणासाठी नेपाळला गेलेल्या अभिनेता के.विजयची टीम भूकंपाच्या तावडीत सापडली. आपल्या एसयूव्ही कारमधून इतर सहकाऱयांसोबत चित्रीकरण पूर्ण झाल्यानंतर परतत असताना भूकंपाच्या तडाख्यात के. विजयचा जागीच मृत्यू झाल्याची माहिती चित्रपटाचे संगीत दिग्दर्शक किशन यांनी दिली आहे. तर, त्याच्यासोबतचे इतर तिघे जखमी झाल्याचे समजते. के.विजय मूळचा आंध्रप्रदेशचा रहिवासी होता. 'एतकरम.कॉम' या आगामी चित्रपटाच्या चित्रीकरणासाठी २० जणांची टीम नेपाळमध्ये गेली होती.
