अमेरिकेतील अतिशय अवघड, धाडसी व प्रतिष्ठेची समजली जाणारी‘रेस अॅक्रॉस अमेरिका’ अर्थात रॅम ही सायकल स्पर्धा नाशिकच्या डॉ. हितेंद्र महाजन आणि डॉ. महेंद्र महाजन यांनी आठ दिवस १४ तासात पूर्ण करून हे अंतर पूर्ण करणारे पहिले भारतीय होण्याचा मान मिळविला. त्यांना ४८०० किलोमीटरचे अंतर नऊ दिवसात पूर्ण करावयाचे होते. त्यांच्या यशाचा आनंदोत्सव सोमवारी नाशिकच्या सायकलस्वारांनी जल्लोषात साजरा केला. कृषीनगरच्या जॉगिंग ट्रॅकवर नाशिक सायक्लिस्टच्या सदस्यांनी गुलाल उधळून पेढेही वाटले आणि महाजन यांच्या घरी जाऊन महाजन कुटुंबियांचे अभिनंदन केले. डॉ. महाजन बंधुंनी सहभाग घेतलेली ही स्पर्धा मानसिक व शारीरिक क्षमतेचा कस पाहणारी आहे. त्यात जवळपास माउंट एव्हरेस्टच्या तीनपट चढाईइतके अंतर मार्गक्रमण करावे लागते. अमेरिकेच्या पश्चिम किनाऱ्यापासून पूर्व किनाऱ्यापर्यंत साधारणत: ४८०० किलोमीटरचे अंतर सायकलद्वारे त्यांनी पूर्ण केले. मागील ३४ वर्षांपासून अमेरिकेत आयोजित केली जाणाऱ्या या स्पर्धेची अतिशय अवघड अशी ओळख आहे. स्पर्धेत १३० संघांनी सहभाग नोंदविला होता. ही स्पर्धा यशस्वीपणे पूर्ण करणारे ते पहिलेच भारतीय ठरल्याचा आनंद महाजन बंधुंच्या नाशिकमध्ये उत्साहात साजरा झाला. नाशिक सायक्लिस्टच्या सदस्यांनी कृषीनगर जॉगिंग ट्रॅकवर एकत्र येऊन गुलालाची उधळण केली. पेढेही वाटले. त्यानंतर सदस्यांचा सायकलद्वारे मोर्चा डॉ. महाजन यांच्या घरी गेला. महाजन कुटुंबियांचे सदस्यांनी अभिनंदन केले. अमेरिकेतील १२ राज्ये आणि वेगवेगळ्या भौगोलिक प्रदेशातुन या स्पर्धेत मार्गस्थ व्हावे लागते. त्यात अॅरिझोनचे वाळवंट, बर्फाच्छादित कॉलोटॉडो, जीवघेण्या उंचीच्या अल्पाचियान पर्वतरांगा आदींच्या समावेश होता. डॉ. महाजन यांनी नऊ दिवसात पूर्ण करावयाचे हे अंतर १० तास आधीच पूर्ण केल्याची माहिती सायक्लिस्टचे अध्यक्ष विशाल उगले यांनी सांगितले.
