मुंबई : रिझव्‍‌र्ह बँकेने मुंबई जिल्हा मध्यवर्ती सहकारी बँक अर्थात मुंबई बँकेवर गेल्या १५ वर्षांपासून असलेले गुंतवणूकविषयक निर्बंध हटविण्याचा निर्णय घेतला आहे. कलम ३५-ए, पोटकलम (२) अंतर्गत हे निर्बंध बँकेवर ३१ जुलै २००३ पासून लागू होते. ते आता उठवत असल्याचे रिझव्‍‌र्ह बँकेने १४ जून २०१८ रोजी परिपत्रकाद्वारे स्पष्ट केले आहे. निर्बंध हटविले गेल्याने मुंबई बँकेला म्युच्युअल फंड आणि सरकारी रोख्यांमध्ये अधिक ताकदीने गुंतवणूक करण्याचे जास्तीत जास्त पर्याय उपलब्ध होतील. बँकेचा महसूल वाढेल परिणामी बँकेच्या नफ्यामध्ये सकारात्मक वाढ होईल. तसेच बँकेला इंटरनेट बँकिंग सुविधेसाठी आता रिझव्‍‌र्ह बँकेची मान्यता सहजपणे मिळू शकते, असा विश्वास मुंबई बँकेचे अध्यक्ष प्रवीण दरेकर यांनी व्यक्त केला. बँकेला आपल्या ग्राहकांसाठी ऑनलाइन सुविधांचे दालन यातून खुले करता येणार आहे, ही बाब बँकेच्या व्यवसायात वाढीसाठी पूरक ठरेल. सद्य:स्थितीत बँकेच्या ठेवी ५०७८ कोटींवर असून खेळते भांडवल सुमारे ६६०० कोटींवर आहे.
