मुंबई : प्रस्तावित डिजिटल चलनाच्या योजनेवर ठाम असल्याचे स्पष्ट करीत, रिझर्व्ह बँकेचे गव्हर्नर शक्तिकांत दास यांनी या नवीन प्रणालीतील सायबर सुरक्षा आणि ऑनलाइन फसवणूक ही प्रमुख आव्हाने असल्याचे बुधवारी मत नोंदविले. ‘सेंट्रल बँक डिजिटल करन्सी (सीबीडीसी)’चे घाऊक आणि किरकोळ असे मुख्यत: दोन प्रकार आहेत. यापैकी घाऊक प्रकारावर आधीपासून बरेच काम झाले आहे. अडचण ही सर्वसामान्यांसाठी खुल्या ‘किरकोळ’ प्रकाराबाबत असून, त्या संबंधाने गुंतागुंत लक्षात घेत ते मूर्तरूपात येण्यास वेळ लागेल, अशी स्पष्टोक्ती डेप्युटी गव्हर्नर टी. रबी शंकर यांनी केली. जगातील इतर प्रमुख मध्यवर्ती बँकांकडून टाकल्या गेलेल्या पावलाचे अनुकरण करीत मध्यवर्ती बँकेनेही ‘सीबीडीसी’ची योजना आखून, आगामी आर्थिक वर्षारंभापासून ते प्रयोग म्हणून राबविण्याचे ठरविले आहे.
