Chanakya Niti 6 Strategies For Defeating A Stronger Enemy : जीवनात प्रत्येक टप्प्यावर अनेक आव्हाने येतात, शत्रूने निर्माण केलेल्या समस्या आणि प्रश्नांवर काय करावे ते सुचत नाही. मग अशा वेळी आपल्या प्रगतीत आणि शांततेत बाधा निर्माण होते. पण, या सर्वांवर मात करण्यासाठी आचार्य चाणक्य यांनी काही सोपे मार्ग सांगितले आहेत. त्यांच्या मदतीने तुम्ही सहजपणे शत्रूवर मात करू शकता. आचार्य चाणक्य हे एक महान मुत्सद्दी आणि विचारवंत होते. त्यांची धोरणे आजही आपल्याला शत्रूवर कशी मात करावी हे शिकवतात.
शत्रूला हरवण्यासाठी त्याच्याशी मित्रासारखे वागा
आचार्य चाणक्य यांच्या मते, शत्रूला पराभूत करण्यासाठी प्रथम त्याच्याशी मित्रासारखे वागले पाहिजे. त्यामुळे त्याच्या योजना, विचार व कमकुवतपणा जवळून समजून घेण्यास मदत होईल. वेळ आल्यावर तुम्ही त्याला पराभूत करू शकता. चाणक्य नीतीनुसार, शत्रूशी सामना करण्यासाठी हुशारी, संयम आवश्यक आहे.
आचार्य चाणक्य यांनी सांगितले ‘हे’ मार्ग
१) आचार्य चाणक्य यांच्या मते, शत्रूला कधीही कमी लेखू नये. लहान किंवा कमकुवत समजला जाणारा शत्रूही मोठे नुकसान करू शकतो. म्हणून नेहमी सतर्क राहिले पाहिजे.
२) जर तुम्हाला तुमच्या शत्रूला पराभूत करायचे असेल, तर त्याची मानसिकता आणि रणनीती समजूत घेणे खूप महत्त्वाचे आहे. त्यामुळे त्याला पराभूत करणे सोपे होऊ शकते.
३) शत्रूशी नेहमीच मित्रासारखे वागले पाहिजे. तुम्ही त्याच्याशी आरामात बोलू शकता; परंतु त्याच्यावर बारकाईने लक्ष ठेवा. त्यामुळे तुम्हाला त्याचा कमकुवतपणा ओळखण्यास मदत होईल.
४) आचार्य चाणक्य यांच्या मते, तुम्ही कधीही तुमच्या योजना उघड करू नये. गुप्तता ही तुमची सर्वांत मोठी ताकद आहे.
५) चाणक्य यांच्या मते, कधीही शत्रूने चिथावण्याचा प्रयत्न केल्यास, तो प्रयत्न सफल होऊ देऊ नका. तुम्हाला चिथावणे हाच शत्रूचा उद्देश असतो, जेणेकरून तुम्ही रागवाल आणि काही चुकीचे पाऊल उचलाल. जर तुम्ही रागात असाल, तर तुमचा कमकुवतपणा बाहेर येईल आणि तो अधिक शक्तिशाली होईल. म्हणून शांत राहणे आवश्यक आहे.
६) तुमच्या शत्रूच्या चांगल्या वागण्याने गोंधळून जाऊन, कधीही त्याच्यावर विश्वास ठेवू नका. कारण- दुष्ट माणूस कधीही त्याचा स्वभाव बदलत नाही. संधी आल्यावर तो तुम्हाला फसवू शकतो.
