Pitru Paksha 2025: पितृ पक्षात कावळ्याव्यतिरिक्त ‘या’ रूपातही आशीर्वाद देतात पूर्वज; रिकाम्या हाती कधीही माघारी पाठवू नका

पितृ पक्षात या पाहुण्यांना उपाशी ठेऊ नका

कावळे

पितृ पक्षात दारात कावळे आल्यास त्यांना उडवून लावू नका अन्यथा पूर्वजही नाराज होतात असे म्हणतात, त्यामुळे केवळ श्राद्ध कार्यातच नव्हे, इतरही वेळेस कावळ्याला विशेष मान असतो. असं म्हणतात की, ज्याप्रमाणे माणसांना उजेडात पाहण्याची दृष्टी आहे, वटवाघूळ व घुबडाला अंधारात पाहण्याची दृष्टी आहे; तसेच कावळ्याला जीवात्मा पाहण्याचे वरदान लाभले आहे, त्यामुळे कावळे दारात येणे हे संकेत मानले जातात.

गरीब

पितृ पक्षात तुमच्या दारी जर कोणी भिक्षा मागायला आले किंवा तुम्हाला वाटेत कोणी मदत मागितली तर निदान मदत करण्याचा प्रयत्न करा. गरिबांना पोळी भाकरी जे शक्य असेल ते अन्न दान करा. या दिवसांत वस्त्रदान शुभ मानले जाते, इतकंच नाही तर तुमच्या पूर्वजांच्या आवडीची गोष्टसुद्धा दान करण्याची पद्धत आहे. याच काळात नव्हे तर इतरही दिवशी अशा गरजूंचा अपमान करू नये.

कुत्रा

कुत्रा हा यमाचा दूत मानला जातो. पितृ पक्षात पंचबली नैवेद्य कुत्र्यालासुद्धा दाखवला जातो. जर तुमच्या दारात पितृ पक्षात कुत्रा आला तर त्याला हाकलवून लावू नका, शक्य असल्यास खाऊ घाला. या प्राण्यांना अनेकजण शिळं अन्न, खराब झालेले पदार्थ देतात; पण हा पूर्वजांचा अपमान ठरू शकतो, त्यामुळे असे करणे टाळावे.

गाय

गाईच्या देहात ३३ कोटी देवांचा वास असल्याची मान्यता आहे, त्यामुळे पितृ पक्षात गाय दारात आल्यास तिला नैवेद्यातील जेवण खाऊ घालावे. शहरी भागात हे फार शक्य होत नाही; अशावेळी निदान श्राद्धकार्याच्या दिवशी गाईला नैवेद्य दाखवावा.

(टीप- वरील लेख प्राप्त माहितीवर आधारित आहे, यातून अंधश्रद्धा पसरवण्याचा हेतू नाही)