भुमरेंच्या ‘श्रीमंत’ वाहनचालकाची ‘महसूल’कडून चौकशी; चंद्रशेखर बावनकुळे यांची घोषणा

खासदार व माजी मंत्री संदीपान भुमरे व आमदार विलास भुमरे यांच्या वाहनचालकास हिबानामाच्या आधारे केवळ एक नव्हे, तर दोन जमिनीचे तुकडे देण्यात आले असून, त्यांचे बाजारमूल्य ५०० कोटी रुपयांपेक्षा अधिक असल्याचा आरोप यापूर्वी इम्तियाज जलील यांनी केला होता. याशिवाय या प्रकरणात जावेद रसूल शेख यास प्राप्तिकर विभागानेही नोटीस बजावली. मात्र, या नोटिशीमधून त्याला कर लावता येण्याची शक्यता कमी असल्याचे सूत्रांनी सांगितले. हे प्रकरण महसूल दप्तरी वादग्रस्त असेल, तर जमीन प्रकरणात कोणाला कर लावायचा, हे ठरवता येणार नाही, असेही सांगितले जात आहे. दरम्यान, अनेकांकडून तक्रार आली आहे. ती तक्रार तशी मोठी आहे. आलेल्या तक्रारीची चौकशी करावीच लागते, असे बावनकुळे म्हणाले.

बावनकुळे यांनी गुरुवारी धाराशिव येथेही अधिकाऱ्यांची बैठक घेतली. राज्यात अपुऱ्या मनुष्यबळामुळे अनेक ठिकाणी जमीन मोजणीची प्रक्रिया खोळंबली आहे. त्यामुळे जमीनखरेदी आणि नोंदणी प्रक्रियेवरही त्याचा मोठा परिणाम होत आहे. पुढील काळात राज्यात जमीन मोजणीसाठी १० खासगी विशेष तज्ज्ञांची मदत घेण्यात येणार आहे. रोव्हरच्या साहाय्याने ही मोजणी केली जाणार आहे. त्यासाठी १६०० रोव्हर विकत घेण्याचे निश्चित झाले असून, १३०० रोव्हर खरेदी करण्यात आले आहेत. तांत्रिक गुणवत्तेवर एक दरपत्रक निश्चित करून प्रत्येक जिल्ह्यासाठी १० पेक्षा अधिक एजन्सी जमीन मोजणीसाठी दिल्या जाणार असल्याचेही बावनकुळे म्हणाले.