छत्रपती संभाजीनगर : अभ्यासक्रमानंतर तत्काळ मोटारसह दुरुस्तीच्या क्षेत्रातील कंपन्यांमध्ये थेट निवड आणि वर्षभरानंतर महिना २५ ते ३० हजार रुपयांपर्यंतचे वेतन हाती येत असल्याने ग्रामीण भागातील दहावी उत्तीर्ण मुलांचा तंत्रनिकेतनमधील मेकॅनिकल शाखेकडे ओढा दिसून येत असल्याचे प्रवेश प्रक्रियेतील पहिल्या टप्प्यातले चित्र आहे.
मराठवाड्यात तंत्रनिकेतनचे खासगी व शासकीय मिळून ४८ पेक्षा अधिक महाविद्यालये आहेत. यात तंत्रनिकेतनमध्ये मेकॅनिकलचा अभ्यासक्रम असणारे २६ महाविद्यालये असून, मराठवाड्यात मेकॅनिकल शाखेसाठी विद्यार्थ्यांच्या ३ हजार ८१७ जागा आहेत. यातील बहुतांश महाविद्यालये हे तालुकास्तरावर असून, अकरावी, बारावीला करण्यापेक्षा थेट तंत्रनिकेतनमधील मेकॅनिकलची शाखा निवडीला सध्या विद्यार्थी प्राधान्य देत असल्याचे चित्र आहे. मेकॅनिकल शाखेचा अभ्यासक्रम पूर्ण केल्यानंतर साधारणपणे उत्पादन, ऑटोमोबाॅईल, एरोस्पेस, ऊर्जा, बांधकाम आणि इतर विविध उद्योगांमध्ये यांत्रिकी अभियंत्यांची मागणी असते.
यंत्र अभियांत्रिकीमध्ये कटिआ, प्रोई, हायपरमेश आणि एन्सिस यांसारखे अनेक साॅफ्टवेअर उपलब्ध आहेत. त्यामुळे डिझाईन आणि सिम्युलेशनमध्ये मेकॅनिकल अभियंत्यांशिवाय पर्याय नाही. कारण ही मुख्यत्वे मेकॅनिकलशी निगडित साॅफ्टवेअर असून, येत्या काळात त्यांना विविध क्षेत्रांमधून मोठी मागणी असेल, असे या क्षेत्रातील तज्ज्ञ सांगत आहेत.
यंत्र अभियांत्रिकीकडे कल
‘मेक इन इंडिया’ या उपक्रमांतर्गत उत्पादित (मॅन्युफॅक्चरिंग) क्षेत्रात यंत्र अभियांत्रिकीला प्रचंड मागणी आहे. मराठवाड्यातल्या ग्रामीण भागातील विद्यार्थी १९ व्या वर्षी पदविका अभ्यासक्रम पूर्ण केल्यानंतर तृतीय वर्षाचा निकाल लागण्यापूर्वीच कॅम्पस मुलाखतीमध्ये निवडले जात आहेत. – डाॅ. रमण देशपांडे, प्राचार्य, योगेश्वरी तंत्रनिकेतन
मराठवाड्यातील अंबाजाेगाईसह इतर काही भाग, उत्तर महाराष्ट्र, अहिल्यानगर या भागातील तंत्रनिकेतनचे जवळपास ५०० विद्यार्थी कॅम्पसमधून आम्ही निवडले आहेत. छात्रवृत्ती (स्टायपेण्ड) सुरुवातीला वर्षभरासाठी १७ हजार मिळतात. वर्षभरानंतर २५ ते ३० हजार रुपये मिळतात. सध्या नामांकित कंपन्यांमध्ये मेकॅनिकल शाखेच्या विद्यार्थ्यांना ६ ते ७ लाख रुपयांचे वार्षिक पॅकेज मिळते. बी. ई. इंजिनिअरिंग तुलनेत तंत्रनिकेतनच्या विद्यार्थ्यांची निवड केली जाते – अनंत दांडेकर, औद्योगिक क्षेत्रातील अभ्यासक
