अतिवृष्टीमुळे हार्वेस्टरचा व्यवसाय अडचणीत; बँकांचे हप्ते थकले; शेतीच्या जोड व्यवसायावरही ‘पाणी’; चालक अडचणीत

छत्रपती संभाजीनगरजवळच्या आडगावचे नागरे हे रहिवासी. काही वर्षांपूर्वी त्यांनी हार्वेस्टर स्वत: आधी विकत घेतला. त्यानंतर त्यांनी वितरक म्हणूनही काम सुरू केले. शेतकऱ्यांना हार्वेस्टरचे बहुपयोग सांगून त्यातल्या जोड धंद्यामागच्या नफ्याचे गणित समजावून सांगत मराठवाड्यात सहाशेपेक्षा अधिक हार्वेस्टरची विक्री केल्याचा दावा नागरे करतात.

हार्वेस्टरमध्ये दोन प्रकार असून, एकाच्या माध्यमातून सोयाबीन, तूर, मका, उडीद, मूग, बाजरी आदी पिकांची कापणी होते. तर, उसासाठी स्वतंत्र हार्वेस्टर असते. उसाव्यतिरिक्त पिकाच्या एका हार्वेस्टरची किंमत गतवर्षी २६ लाखांपर्यंत होती. यंदा ३४ लाख झाली आहे. २६ लाख रुपयांना घेतलेल्या हार्वेस्टरसाठी साधारण १७ ते २० लाख रुपयांपर्यंतचे कर्ज मंजूर होते. ७ ते ८ लाखांची सवलत मिळते. कर्ज फेडण्यासाठी साधारणपणे सहा महिन्यांसाठी ३ लाख २० हजारांचा हप्ता बसतो. सहा महिन्यांचे दहा हप्त्यांत कर्ज फेडावे लागते. साधारणपणे एका हंगामात गहूकापणीतून ५ लाखांचा, तूर व सोयाबीन काढणीतून प्रत्येकी दोन लाख व इतर पिकांमधून मिळून वार्षिक आठ ते दहा लाखांचा सर्व खर्च जाता नफ्याचे गणित असते. परंतु यंदा ऊस सोडून अन्य पिके चिखलातच रुतून बसल्याने खरेदी केलेल्या हार्वेस्टरला कापणीचे काहीच काम राहिले नसल्याने चालक अडचणीत सापडले आहेत.

हार्वेस्टर चालकांचे यंदा हाल सुरू आहेत. पिकेच शेतात राहिली नसल्याने कापणीच्या व्यवसायातून मिळणाऱ्या नफ्यावरच्या आशेवरच पाणी फेरले गेले. शेतीला जोड व्यवसाय म्हणून मागील तीन वर्षांमध्ये सहाशे हार्वेस्टर खरेदीदारांपुढे मोठा प्रश्न उभा राहिला आहे.किशोर नागरे, हार्वेस्टर मालक