अदानी पॉवरकडून शेअर स्प्लिटची घोषणा; गुंतवणूकदारांना लॉटरी

कंपनीने तिच्या इतिहासात पहिल्यांदाच समभाग विभाजन केले आहे. किरकोळ गुंतवणूकदारांना प्रोत्साहन देत त्यांचा सहभाग वाढावा. त्यांना गुंतवणूक करण्यासाठी समभाग अधिक परवडणारे बनविण्यासाठी आणि कंपनीच्या समभागांची तरलता वाढविण्यासाठी समभाग विभाजनाला मान्यता देण्यात आली आहे, असे अदानी पॉवरने निवेदनात सांगितले. शुक्रवारच्या सत्रात अदानी पॉवरचा समभाग २१.१० रुपयांनी घसरून ५६७ रुपयांवर बंद झाला. सध्याच्या शेअरच्या बाजारभावानुसार, कंपनीचे २,१८,६८८ कोटी रुपयांचे बाजारभांडवल आहे.

आता किती समभाग होणार?

जर एखाद्या भागधारकाकडे अदानी पॉवरचे १०० रुपये किमतीचे १० समभाग असतील, तर समभाग विभाजनानंतर त्याच्याकडे कंपनीचे ५० समभाग असतील. समभाग विभाजनानंतर प्रत्येक शेअरची किंमत २० रुपये असेल. मात्र, त्याच्याकडील एकूण समभागांची किंमत १००० रुपये कायम राहील. त्यानंतर समभागांच्या बाजारभावानुसार त्यात वध-घट होईल.

समभाग विभाजन म्हणजे काय?

समभाग विभाजन म्हणजे एका समभागांचे समान भागात विभाजन केले जाते. यामुळे कंपनीचे दर्शनी मूल्य कमी होत असले तरी विभाजन झाल्याने महागडा वाटणारा समभाग आवाक्यात येतो. उदा दहा रुपये दर्शनी मूल्य असलेल्या समभागाचे विभाजन दोन भागात करण्यात आले तर भागधारकांच्या खात्यात त्या कंपनीचे ५ रुपये दर्शनी मूल्य असलेले दोन समभाग जमा होतील. शिवाय कंपनीच्या समभागाचे बाजारमूल्य सुद्धा निम्मे होईल.

कंपनीची कामगिरी कशी?

विद्यमान आर्थिक वर्षाच्या जून अखेर सरलेल्या पहिल्या तिमाहीमध्ये कंपनीचा निव्वळ नफा १३.५ टक्क्यांनी घसरून ३,३८४ कोटी रुपयांवर आला आहे. दरम्यान, कंपनीचा महसूल ६ टक्क्यांनी घसरून १४,१०९ कोटी रुपये झाला आहे. ३१ मार्च २०२५ रोजी संपलेल्या चौथ्या तिमाहीत अदानी पॉवर लिमिटेडचा एकत्रित निव्वळ नफा ५ टक्क्यांनी कमी होऊन २,५९९ कोटी रुपयांवर पोहोचला होता.

डिस्क्लेमर : कोणतीही कंपनी बक्षीस (बोनस), लाभांश (डिव्हिडंड ) किंवा समभाग विभाजन (स्टॉक स्प्लिट) करणार म्हणून त्या कंपनीच्या शेअरची खरेदी करू नये. आपल्या आर्थिक सल्लागाराशी चर्च करून आणि स्वतः कंपनीच्या फंडामेंटल्सचा अभ्यास करून समभाग खरेदीचा निर्णय घ्यावा.