देशाच्या कारखानदारीच्या तब्येतीत सुधार; औद्योगिक उत्पादन वाढ जुलैमध्ये ३.५ टक्क्यांवर

नवी दिल्लीः देशातील निर्मिती क्षेत्राच्या चांगल्या कामगिरीमुळे, सरलेल्या जुलैमध्ये भारताचा औद्योगिक उत्पादनांतील वाढ चार महिन्यांच्या उच्चांकी ३.५ टक्क्यांच्या पातळीवर पोहोचली आहे, असे गुरुवारी जाहीर झालेल्या अधिकृत आकडेवारीने स्पष्ट केले.
देशातील कारखानदारीचे आरोग्यमान दर्शविणाऱ्या औद्योगिक उत्पादन वाढीचा वेग आधीच्या जून महिन्यांत अवघा १.५ टक्क्यांवर होता, तर गतवर्षी म्हणजेच जुलै २०२४ मध्ये ते पाच टक्क्यांनी वाढले होते. यापूर्वी मार्च २०२५ मध्ये त्यात ३.९ टक्के वाढ नोंदवण्यात आली होती.

राष्ट्रीय सांख्यिकी कार्यालयाने (एनएसओ) प्रसिद्धीस दिलेल्या ताज्या आकडेवारीनुसार, जुलै २०२५ मध्ये निर्मिती/ उत्पादन क्षेत्रात ५.४ टक्क्यांची वाढ दिसून आली, जी गेल्या वर्षीच्या याच महिन्यात ४.७ टक्क्यांपेक्षा अधिक राहिली आहे. या उलट खाण उत्पादनात ७.२ टक्क्यांनी घट झाली, जे गेल्या वर्षी जुलैमध्ये ३.८ टक्क्यांनी वाढले होते. वीज उत्पादनातही केवळ ०.६ टक्क्यांनी वाढ झाली, जी गेल्या वर्षीच्या याच कालावधीत ७.९ टक्के होती.
आर्थिक वर्ष २०२५-२६ च्या एप्रिल ते जुलै या चार महिन्यांच्या कालावधीत, देशाचे एकूण औद्योगिक उत्पादन गेल्या वर्षीच्या ५.४ टक्क्यांच्या तुलनेत यंदा केवळ २.३ टक्क्यांनी वाढले आहे.

आकडेवारीवर भाष्य करताना पतमानांकन संस्था ‘इक्रा’च्या मुख्य अर्थतज्ज्ञ आदिती नायर म्हणाल्या की, निर्मिती क्षेत्राची वाढ ५.४ टक्के अशी सहा महिन्यांच्या उच्चांकावर पोहोचली हे उत्साहदायी आहे. यापूर्वी जानेवारी २०२५ मध्ये या क्षेत्रात ५.८ टक्क्यांची वाढ दिसून आली होती. बरोबरीने बांधकाम सामग्री आणि ग्राहकोपयोगी वस्तूंच्या क्षेत्रातील वाढीनेही मदतीचा हात दिला.