जम्मू काश्मीर येथील रामबन जिल्ह्यातील बनिहाल या ठिकाणी प्रवासी बस कोसळून अपघात झाला आहे. या अपघातात २० जणांचा मृत्यू झाला तर १३ जण जखमी झाले आहेत. घटनास्थळी बचावकार्य सुरु करण्यात आले आहे तर पोलीसही त्या ठिकाणी पोहचले आहेत. जम्मू सरकारने मृतांच्या कुटुंबीयांना ५ लाखांची मदत जाहीर केली आहे. तर जखमींना ५० हजारांची नुकसान भरपाई दिली जाणार असल्याचीही घोषणा केली आहे.

प्रवासी बस आज सकाळी १० च्या सुमारास केला मॉथच्या दिशेने जात होती. त्याच दरम्यान चालकाचे बसवरचे नियंत्रण सुटले ज्यामुळे ही बस दरीत जाऊन कोसळली. ही बस ज्या ठिकाणी कोसळली तो भाग खोल आहे. त्यामुळे बचाव कार्यात काहीशा अडचणी येत आहेत. सुरुवातीला दहाजण ठार झाल्याची माहिती समोर आली होती. मात्र मृतांचा आकडा आता २० वर पोहचला आहे.

जुलै महिन्यात महाराष्ट्रातील पोलादपूरमध्येही अशीच एक घटना घडली होती. या अपघातात पिकनिकसाठी जाणारी बस पोलादपूरजवळ आंबेनळी घाटात ४०० फूट दरीत कोसळली होती. या अपघातात फक्त एक प्रवासी वाचला तर ३३ जणांचा मृत्यू झाला. जम्मूमध्ये आज घडलेल्या या अपघाताने त्याच आठवणी ताज्या केल्या आहेत.