अमृतसरमधील जोडा रेल्वेफाटक अपघाता प्रकरणी पंजाब पोलिसांनी ट्रेनच्या मोटरमनला ताब्यात घेतले असून त्याची चौकशी सुरु आहे. शुक्रवारी रात्री जालंधरहून अमृतसरच्या दिशेने भरधाव वेगात जाणाऱ्या ट्रेनने जोडा फाटक येथे रुळावर रावण दहन पाहत उभ्या असलेल्या अनेकांना उडवलं. या अपघातात ६० पेक्षा जास्त जणांचा मृत्यू झाला आहे. मला ट्रेन पुढे नेण्यासाठी हिरवा कंदिल दाखवण्यात आला होता. सर्व मार्ग मोकळा आहे असे मला वाटले. रेल्वे रुळावर इतके लोक थांबले आहेत याची मला अजिबात कल्पना नव्हती असे या मोटरमनने सांगितले. रावण दहन कार्यक्रमाच्या आयोजकांविरोधात अजून कोणतीही कारवाई करण्यात आलेली नाही. आयोजक हे पंजाबमधील सत्ताधारी काँग्रेस पक्षाचे नेते आहेत. दरम्यान आयोजक भूमिगत झाल्याची माहिती आहे. तर टळला असता अपघात पंजाबमधील अमृतसरजवळील जोडा रेल्वेफाटकाजवळ शुक्रवारी रात्री रावण दहनाच्या कार्यक्रमा दरम्यान घडलेली भीषण दुर्घटना टाळता आली असती किंवा मृतांचा आकडा आणखी कमी होऊ शकला असता. रेल्वे रुळाजवळ होणाऱ्या रावण दहनाच्या कार्यक्रमाची कोणतीही माहिती किंवा सूचना देण्यात आली नव्हती असे अमृतसर रेल्वेमधील वरिष्ठ सूत्रांनी सांगितले. दुर्लक्ष झालं पण कोणी जाणीवपूर्वक अपघात घडवून आणलेला नाही अमृतसरजवळील जोडा रेल्वेफाटकाजवळ शुक्रवारी रात्री रावण दहनाच्या कार्यक्रमा दरम्यान घडलेली घटना दुर्देवी आणि दु:खद आहे. हा अपघात होता हे सर्वप्रथम आपल्याला समजून घेतले पाहिजे. निश्चित दुर्लक्ष झाले पण हे कोणी जाणीवपूर्वक हेतू किंवा उद्देशाने घडवून आणलेले नाही असे नवज्योतसिंग सिद्धू म्हणाले.