निवृत्त भारतीय नौदल अधिकारी कुलभूषण जाधव यांच्यासाठी वकील नेमण्याचा आदेश देऊन पाकिस्तानच्या इस्लामाबाद उच्च न्यायालयाने भारताला आणखी एक संधी दिली असून तीन वकिलांची न्यायमित्र म्हणून नेमणूक केली आहे. न्यायालयाने असा आदेश दिला की, या प्रकरणी सुनावणीसाठी मोठय़ा पीठाची स्थापना करावी. तसेच ३ सप्टेंबरला या पीठापुढे दुपारी दोन वाजता जाधव यांना लष्करी न्यायालयाने सुनावलेल्या मृत्युदंडाच्या शिक्षेवर सुनावणी होईल. अबीद हुसेन मंटो व हमीद खान हे सर्वोच्च न्यायालयातील वरिष्ठ वकील तसेच माजी महाधिवक्ता मखदूम अली खान यांना न्यायामित्र म्हणून नेमण्यात येत आहे.
