छत्तीसगडच्या बीजापूरमध्ये भाजपाच्या एका युवा नेत्याची धारधार शस्त्राने हत्या करण्यात आल्याचं वृत्त आहे. भोपालपट्टनम क्षेत्रात सोमवारी रात्री ही घटना घडली. पोलीस स्थानकापासून अवघ्या 200 मीटर अंतरावर ही हत्या करण्यात आल्याची माहिती आहे. बस्तर क्षेत्राचे पोलीस महासंचालक विवेकानंद सिन्हा यांनी दिलेल्या माहितीनुसार, भाजपा नेते जगदीश कुंडरू(40) हे संध्याकाळी 7 वाजेच्या सुमारास आपल्या घराबाहेर काही लोकांसोबत बोलत होते. त्याचवेळी काही अज्ञात व्यक्ती तेथे आले आणि कु-हाड व अन्य धारधार शस्त्राच्या सहाय्याने त्यांनी हल्ला चढवला. जखमी अवस्थेत त्यांना रूग्णालयात दाखल केलं पण तेथे त्यांना मृत घोषीत करण्यात आलं. जनसत्ताने याबाबत वृत्त दिलं आहे. या घटनेमागे नक्षलवाद्यांचा हात असण्याचा संशय व्यक्त होत आहे. पोलीस घटनेची चौकशी करत आहेत.
