बंगळुरुमध्ये २२ वर्षांच्या तरुणाने ६५ वर्षीय व्यक्तीची हत्या केल्याने खळबळ उडाली आहे. राकेश याने बॅटने ज्येष्ठ व्यक्तीला मारहाण केली आणि नंतर मानेवर वार करत हत्या केली. यानंतर त्याने त्यांच्या अंगावरील सोन्याचे दागिने चोरत पळ काढला. हे सर्व त्याने फक्त आपल्या अंगावर असणारं ३० हजारांचं कर्ज फेडण्यासाठी केलं असल्याची माहिती पोलिसांनी दिली आहे. पोलिसांनी राकेशला अटक केली असून त्याच्याकडून सोन्याचे दागिने जप्त केले आहेत. आरोपी पीडित व्यक्तीला मूर्ती यांना ओळखत होता असं पोलिसांनी सांगितलं आहे. राकेश श्रीमंत कुटुंबातील असून त्याच्या वडिलांची सात कोटींची संपत्ती आहे. नेमकं काय झालं? बंगळुरुमधील २२ वर्षीय तरुण राकेश याने ६५ वर्षीय मूर्ती यांची हत्या केली आहे आणि त्यांच्या अंगावरील दागिने लंपास करत पळ काढला. हे दागिने विकून आपल्या डोक्यावर असणारं ३० हजारांचं कर्ज त्याला फेडायचं होतं. १५ जानेवारी रोजी ही घटना घडली. मिळालेल्या माहितीनुसार, राकेश याने मूर्ती यांच्यावर पाठीमागून हल्ला केला आणि बॅटने वार केला. नंतर त्याच्या मानेवर वार केला आणि दागिने घेऊन पळ काढला. राकेश याने झुडपांमध्ये मूर्ती यांचा मृतदेह टाकून देत घटनास्थळावरुन पळ काढला होता. घरी न परतल्याने मूर्ती यांच्या कुटुंबाने पोलीस ठाण्यात तक्रार दाखल केली. सीसीटीव्हीच्या आधारे पोलिसांनी राकेशची चौकशी केली. यावेळी त्याने आपण हत्या केल्याची कबुली दिली. यानंतर पोलिसांनी त्याला अटक केली आहे.
