भारतीय जनता पक्षाचं गोव्याचं संकेतस्थळ हॅक झालं आहे. हॅकर्सनी भाजपाच्या या संकेतस्थळावर पाकिस्तान जिंदाबाद अशा आशयाचा मेसेज लिहिला आहे. सोमवारी (१५ ऑक्टोबर) दुपारच्या सुमारास ही वेबसाईट हॅक झाल्याची प्राथमिक माहिती आहे. गोवा भाजपाचं हे संकेतस्थळ हॅक झालं आहे. संकेतस्थळ हॅक झाल्यानंतर त्यावर पाकिस्तान झिंदाबाद या मेसेजसह catch.if.you.can@Hotmail.com हा मेल आयडी दिसत होता, तसंच त्यासोबत मोहम्मद बिलाल असं नावही होतं. मात्र, आता संकेतस्थळाला भेट देण्याचा प्रयत्न केला असता त्यावर संकेतस्थळाचे काम सुरू असल्याकारणाने संकेतस्थळ बंद आहे अशा संदेश दिसत आहे. भाजपाची बेबसाईट नेमकी कोणी हॅक केली याबाबत अद्याप माहिती उपलब्ध नाही. तसंच भाजपाकडूनही अद्याप यावर कोणतीही प्रतिक्रिया आलेली नाही. यापूर्वी एप्रिल महिन्यात जम्मू-काश्मीर भाजपाचं संकेतस्थळही हॅक करण्यात आलं होतं.
