अमेरिकेचे नवनिर्वाचित राष्ट्राध्यक्ष जो बायडेन यांचा भारतीय वंशाच्या व्यक्तींवर खूपच विश्वास असल्याचे चित्र मागील काही दिवसांपासून दिसत आहे. राष्ट्राध्यक्ष पदाची सुत्रे हाती घेतल्यानंतर ५० दिवसांच्या आत बायडेन यांनी प्रमुख महत्वाच्या पदांवर ५५ हून अधिक भारतीय वंशाच्या अमेरिकन नागरिकांची नियुक्ती केली आहे. तसेच नुकत्याच झालेल्या एका कार्यक्रमामध्ये बायडेन यांनी आता अमेरिकेचा लगाम भारतीयांच्या हाती असल्याचेही वक्तव्य केलं आहे. अमेरिकन अंतराळ संशोधन संस्था म्हणजेच नासाच्या एका कार्यक्रमामध्ये बायडेन यांनी हे वक्तव्य केलं आहे.

बायडेन यांनी मंगळावर पर्सिव्हिअरन्स रोव्हरच्या ऐतिहासिक लॅण्डींगसंदर्भात नुकतीच नासाच्या संशोधकांशी चर्चा केली. या चर्चेमध्ये नासाच्या मंगळ मोहिमेमध्ये महत्वाची भूमिका बजावणाऱ्या भारतीय वंशाच्या संशोधक स्वाति मोहनसुद्धा सहभागी झाल्या होत्या. अमेरिकन राष्ट्राध्यक्षांनी, “भारतीय वंशाच्या व्यक्तींच्या हाती अमेरिकाचा लगाम आहे. तुम्ही (स्वाति मोहन), माझ्या उपराष्ट्राध्यक्ष (कमला हॅरिस), माझे भाषण लिहीणारे (विनय रेड्डी),” अशी यादीच वाचून दाखवली. २० जानेवारी रोजी अमेरिकेचे ४६ वे राष्ट्राध्यक्ष म्हणून शपथ घेणाऱ्या बायडेन यांनी जवळवजळ ५५ महत्वाच्या प्रशासकीय पदांवर भारतीय वंशाच्या अमेरिकन नागरिकांची नियुक्ती करण्याचा ऐतिहासिक निर्णय घेतलाय.

विशेष म्हणजे या ५५ लोकांच्या यादीमध्ये उपराष्ट्राध्यक्ष कमला हॅरिस आणि नीरा टंडन यांचा समावेश नाहीय. टंडन यांनी व्हाइट हाउस ऑप मॅनेजमेंट अ‍ॅण्ड बजेटच्या निर्देशक पदासाठी दाखल केलेला अर्ज मागे घेतला आहे. पहिल्यांदाच अमेरिकन प्रशासनाच्या कामामध्ये एवढ्या मोठ्याप्रमाणात भारतीय वंशाच्या लोकांचा समावेश करण्यात आला आहे.

अमेरिकेचे ४४ वे राष्ट्राध्यक्ष बराक ओबामा यांच्या कार्यकाळामध्येही अनेक भारतीय अमेरिकन नागरिकांना प्रशासनामध्ये सहभागी करुन घेण्यात आलं होतं. मात्र ओबामा प्रशासनापेक्षा बायडेन यांनी अधिक भारतीयांची नियुक्ती करत नवा इतिहास रचलाय. दरम्यानच्या काळात डोनाल्ड ट्रम्प यांच्या चार वर्षांच्या कार्यकाळामध्ये भारतीयांना प्रशासकीय नियुक्त्यांमध्ये फारशी संधी मिळाली नाही. मात्र ट्रम्प हे असे पहिले अमेरिकन राष्ट्राध्यक्ष होते ज्यांनी राष्ट्रीय सुरक्षा परिषदेत आणि कॅबिनेट दर्जाच्या पदांवर भारतीय अमेरिकन नागरिकांना नियुक्त केलं होतं.

बायडेन यांनी काही दिवसांपूर्वीच भारतीय वंशाच्या माजू वर्गीस यांना आपल्या उप सहाय्यक आणि व्हाऊट हाऊस लष्करी कार्यालयाच्या (डब्लूएचएमओच्या) निर्देशकपदी नियुक्त केलं. यापूर्वी वर्गीस हे बायडेन यांच्या निवडणुक प्रचारामध्ये आणि शपथविधी सोहळ्यातील आयोजन करणाऱ्या सदस्यांच्या गटाचा भाग होते. दिवसोंदिवस बायडेन यांच्या प्रशासनामध्ये भारतीयांची संख्या वाढताना दिसत आहे.