मुझफ्फरनगरमधील धार्मिक दंगलींवेळी प्रक्षोभक भाषण केल्याच्या आरोपावरून भारतीय जनता पक्षाचे लखनौमधील आमदार सुरेश राणा यांना उत्तर प्रदेश पोलिसांनी शुक्रवारी अटक केली. राणा यांना पोलिसांनी अज्ञातस्थळी नेले आहे.तीन आठवड्यांपूर्वी मुझफ्फरनगर जिल्ह्यातील वेगवेगळ्या गावांमध्ये दंगल भडकली होती. त्यानंतर राज्य सरकारने नेमलेल्या पथकाकडून या दंगलीची चौकशी सुरू करण्यात आली. दंगल भडकल्यानंतर अटक करण्यात आलेले राणा हे पहिले आरोपी आहेत. राज्यातील एकूण १६ राजकारण्यांविरुद्ध अटक वॉरंट जारी करण्यात आले आहे. ज्यांच्याविरुद्ध अटक वॉरंट जारी करण्यात आले आहे, त्या सर्वांना लवकरच अटक करण्यात येईल, असे पोलीस अधीक्षकांनी स्पष्ट केले आहे.
