अॅमेझॉनची मोठ्या प्रमाणात कर्मचारी कपात

ई कॉमर्स कंपन्यांमध्ये अग्रेसर असलेल्या या कंपनीने जगभरातील आपल्या व्यवसायाचे रि-स्ट्रक्चर करण्यासाठी हे पाऊल उचलले असल्याचे बोलले जात आहे. इतकेच नाही तर येत्या काळात कंपनी आपल्या आणखी काही कर्मचाऱ्यांना नोकरीवरुन कमी करु शकते असे सांगण्यात आले आहे. इकॉनॉमिक टाइम्सने दिलेल्या वृत्तानुसार, केवळ भारतातच नाही तर वेगवेगळ्या कारणांनी जगभरात कर्मचाऱ्यांना कमी करण्यात येत असल्याचे कंपनीने स्पष्ट केले आहे. त्याचबरोबर सध्या असलेले कंपनीतील गट सुनियोजित करण्यासाठी कंपनीने हे पाऊल उचलले आहे असे कंपनीच्या एका वरिष्ठ अधिकाऱ्यांनी सांगितले.

कंपनीच्या या निर्णयामुळे कर्मचाऱ्यांवरी अस्थिर होणे स्वाभाविक आहे. मात्र कामावरुन कमी करण्यात आलेल्या कर्मचाऱ्यांना दुसरे काम देण्याचा आम्ही प्रयत्न करत आहोत असेही कंपनीकडून सांगण्यात आले आहे. त्याचबरोबर येत्या काळात भारतात ४००० पदांसाठी भरती सुरू आहे. फेब्रुवारीत अॅमेझॉनने सिएटल हेड ऑफिसमधून काही कर्मचाऱ्यांना कमी केले. कंपनी नव्याने काही नियोजन करत असून त्याअंतर्गत कर्मचाऱ्यांना नवीन काम देण्यात येईल असे सांगण्यात येत आहे.