माजी पंतप्रधान आणि भारतीय जनता पक्षाचे लोकप्रिय नेते अटल बिहारी वाजपेयी यांचे गुरुवारी संध्याकाळी निधन झाले. त्यांच्या पार्थिवावर अंत्यसंस्कार करण्यात आले आहेत. त्यांना अखेरचा निरोप देताना सगळा देश हळहळला. देशाला नवी दिशा देणारा बाप माणूस हरवल्याची भावना प्रत्येकाच्याच मनात होती. अंत्यसंस्कारांच्या आधी त्यांचे पार्थिव स्मृती स्थळ या ठिकाणी आणण्यात आले. त्यावेळी त्यांच्या पार्थिवाला लष्कराच्या तिन्ही दलांकडून सलामी देण्यात आली. तसेच राष्ट्रपती रामनाथ कोविंद, पंतप्रधान नरेंद्र मोदी यांच्यासह अनेक दिग्गजांनी त्यांच्या पार्थिवाचे अंतिम दर्शन घेतले आणि त्यावर पुष्पचक्र अर्पण केले. अटलजींच्या मानसकन्या नमिता भट्टाचार्य यांनी अटलजींच्या चितेला अग्नी दिला.
नमिता भट्टाचार्य यांनी जेव्हा अग्नी दिला तेव्हा सगळेच नेते, उपस्थित हात जोडून उभे राहिले. अटल बिहारी वाजपेयी यांचे पार्थिव पंचत्त्वात विलीन झाले. त्यांना अखेरचा निरोप देताना सगळ्यांचेच डोळे भरून आले होते. अटलजींच्या अस्थिंचे विसर्जन १९ ऑगस्ट रोजी हरिद्वार येथे करण्यात येणार आहे अशीही माहिती समजली आहे.
अटलजींचे पार्थिव शुक्रवारी सकाळी दिल्लीतील निवासस्थानातून भाजपा मुख्यालयात नेण्यात आले. भाजपा मुख्यालयात पंतप्रधान नरेंद्र मोदी, पक्षाचे राष्ट्रीय अध्यक्ष अमित शाह, लालकृष्ण आडवाणी, केंद्रीय गृहमंत्री राजनाथ सिंह, खासदार हेमा मालिनी आदी नेत्यांनी वाजपेयींच्या पार्थिवाचे अंत्यदर्शन घेतले. दुपारी दोनच्या सुमारास अटल बिहारी वाजपेयींच्या अंत्ययात्रेला सुरुवात झाली. प्रचंड मोठ्या जनसागरात ही अंत्ययात्रा निघाली होती. त्यानंतर अटलजींचे पार्थिव स्मृती स्थळ या ठिकाणी आणण्यात आले.
वाजपेयी हे ११ जूनपासून रुग्णालयात दाखल होते. त्यांना मधुमेहाने ग्रासले होते आणि त्यांचे एकच मूत्रपिंड कार्यरत होते. गेले नऊ आठवडे त्यांच्यावर ‘एम्स’मध्ये उपचार सुरू होते. गेल्या ३६ तासांत त्यांची प्रकृती झपाट्याने खालावली होती. अखेर गुरुवारी संध्याकाळी त्यांचे निधन झाले.
गुरुवारी रात्री वाजपेयी यांचे पार्थिव त्यांच्या निवासस्थानी नेण्यात आले. पक्षाचे नेते, वाजपेयींचे निकटवर्तीय तसेच काँग्रेस अध्यक्ष राहुल गांधी यांनी वाजपेयींच्या पार्थिवाचे दर्शन घेतले. तिथून शुक्रवारी सकाळी अकराच्या सुमारास त्यांचे पार्थिव भाजपा मुख्यालयात नेण्यात आले. वाजपेयींचे निवासस्थान ते भाजपा मुख्यालय या मार्गावर वाजपेयींच्या चाहत्यांनी गर्दी केली होती. आवडत्या नेत्याचे अंतिम दर्शन घेण्यासाठी चाहत्यांची गर्दी झाली होती. भाजपा मुख्यालयाबाहेर कार्यकर्तेही मोठ्या संख्येने जमले आहेत. शिवसेना पक्षप्रमुख उद्धव ठाकरे, डीएमकेचे नेते ए राजा यांनी देखील वाजपेयींच्या पार्थिवाचे अंत्यदर्शन घेतले.
तिन्ही राष्ट्रदलाच्या सलामीनंतर, पंतप्रधान, राष्ट्रपती आणि दिग्गज नेत्यांनी वाहिलेल्या आदरांजलीनंतर माजी पंतप्रधान अटल बिहारी वाजपेयी यांच्या पार्थिवावर अंत्यसंस्कार करण्यात आले.
अटल बिहारी वाजपेयी यांच्या पार्थिवाभोवती गुंडाळलेला तिरंगा झेंडा त्यांची नात निहारीकाकडे सोपवण्यात आला.
स्मृती स्थळ या ठिकाणी अटल बिहारी वाजपेयी यांचे पार्थिव आणण्यात आले आहे. या ठिकाणी त्यांच्या पार्थिवाला अखेरची सलामी देण्यात आली
अटल बिहारी वाजपेयी यांचे पार्थिव स्मृती स्थळावर आणण्यात आले आहे. त्यांच्या पार्थिवावर पुष्पचक्र वाहून पंतप्रधान नरेंद्र मोदी यांनी आदरांजली वाहिली.
माजी पंतप्रधान अटल बिहारी वाजपेयी यांचे पार्थिव स्मृती स्थळ या ठिकाणी आणण्यात आले आहे. आता त्यांच्या पार्थिवाला सलामी देण्यात येईल.
अटल बिहारी वाजपेयी यांना अखेरचा निरोप देण्यासाठी माजी पंतप्रधान मनमोहन सिंग आणि काँग्रेस अध्यक्ष राहुल गांधी हे दोघेही स्मृती स्थळ या ठिकाणी आले आहेत.
अटल बिहारी वाजपेयी यांच्या प्रति आदर दाखवत नवी दिल्ली येथील ब्रिटिश मुख्यालयावरचा युनियन जॅक हा ध्वजही अर्ध्यावर आणण्यात आला
माजी पंतप्रधान अटल बिहारी वाजपेेयी यांच्या अंत्ययात्रेला सुरूवात झाली आहे. त्यांच्या अंत्ययात्रेत भाजपाचे दिग्गज नेते आणि जनसागर लोटला आहे. तसेच पंतप्रधान नरेंद्र मोदी आणि भाजपाचे राष्ट्रीय अध्यक्ष अमित शाह हेदेखील अंत्ययात्रेत सहभागी झाले आहेत.
पंतप्रधान नरेंद्र मोदी, भाजपाचे राष्ट्रीय अध्यक्ष अमित शाह आणि अन्य नेते वाजपेयींच्या अंत्ययात्रेत सहभागी झाले.
माजी पंतप्रधान अटल बिहारी वाजपेयी यांच्या अंत्ययात्रेला सुरुवात, भाजपा मुख्यालयातून अंत्ययात्रा निघाली, रस्त्यावर चाहत्यांची अलोट गर्दी
मुलायम सिंह यादव यांनी वाजपेयींचे अंत्यदर्शन घेतले.
भूतानचे राजे, बांगलादेश, नेपाळ, श्रीलंका या देशांचे परराष्ट्र मंत्री दिल्लीत पोहोचले, अटल बिहारी वाजपेयी यांच्या पार्थिवाचे घेणार अंत्यदर्शन, ब्रिटनच्या भारतातील उच्चायुक्तांनीही घेतले वाजपेयींचे अंत्यदर्शन
अटल बिहारी वाजपेयी यांच्यासारखी विचारधारा असलेल्या नेत्याची देशाला गरज आहे. राजकीय आणि वैचारिक मतभेद असले तरी त्यांनी माणूसकीला कधी धक्का लागू दिला नाही - सीताराम येचुरी
ज्येष्ठ अभिनेत्री आणि भाजपा खासदार हेमा मालिनी यांनी दिल्लीत वाजपेयींच्या पार्थिवाचे अंत्यदर्शन घेतले.
मी अटल बिहारी वाजपेयींना २००६ मध्ये भेटले होतो. ते उत्तम वक्ते होते. त्यांच्या निधनामुळे भारतीय राजकारणात निर्माण झालेली पोकळी कधीही भरुन निघणार नाही. ते सर्वांसाठीच आदर्श होते. कविता, भाषण आणि नेतृत्वाच्या माध्यमातून त्यांनी अनेकांना प्रेरणा दिली : मधूर भांडारकर
शिवसेना पक्षप्रमुख उद्धव ठाकरे यांनी दिल्लीत अटल बिहारी वाजपेयी यांच्या पार्थिवाचे अंत्यदर्शन घेतले.
भाजपाचे ज्येष्ठ नेते लालकृष्ण आडवाणी यांनी अटल बिहारी वाजपेयी यांच्या पार्थिवाचे दर्शन घेतले. अंत्यदर्शन घेताना आडवाणी भावूक
डीएमके नेते ए राजा, आसामचे मुख्यमंत्री सर्वानंद सोनोवाल, मणिपूरचे मुख्यमंत्री वीरेन सिंह यांनी वाजपेयींच्या पार्थिवाचे अंत्यदर्शन घेतले.
पंतप्रधान नरेंद्र मोदी यांनी भाजपा मुख्यालयात अटल बिहारी वाजपेयी यांच्या पार्थिवाचे अंत्यदर्शन घेतले
अटल बिहारी वाजपेयी यांचे पार्थिव भाजपा मुख्यालयात पोहोचले, दुपारी एक वाजेपर्यंत पार्थिव अंत्यदर्शनासाठी मुख्यालयात ठेवणार
भाजपा मुख्यालयात पंतप्रधान नरेंद्र मोदी, अमित शाह, योगी आदित्यनाथ व अन्य नेते
भाजपा मुख्यालयाबाहेर कार्यकर्त्यांची गर्दी, पंतप्रधान नरेंद्र मोदींही मुख्यालयात, थोड्याच वेळात अटलबिहारी वाजपेयी यांचे पार्थिव मुख्यालयात पोहोचणार
वाजपेयी यांच्या पार्थिवाचे अंत्यदर्शन घेण्यासाठी रस्त्याच्या दुतर्फा गर्दी
आज दुपारी ४ वाजता अटलजींवर अंत्यसंस्कार होणार
आंध्र प्रदेशचे मुख्यमंत्री चंद्राबाबू नायडू यांनी अटलबिहारी वाजपेयी यांच्या पार्थिवाचे अंत्यदर्शन घेतले
राहुल गांधी यांनी अटलबिहारी वाजपेयी यांच्या निवासस्थानी जाऊन त्यांच्या पार्थिवाचे अंत्यदर्शन घेतले
राष्ट्रीय सुरक्षा सल्लागार अजित डोवाल यांनी वाजपेयींच्या पार्थिवाचे अंत्यदर्शन घेतले
लष्करप्रमुख बिपीन रावत यांनी पुष्पचक्र अर्पण करत वाजपेयींना श्रद्धांजली अर्पण केली
मोहन भागवत यांनी दिल्लीत अटल बिहारी वाजपेयी यांच्या पार्थिवाचे अंत्यदर्शन घेतले
जावेद अख्तर आणि शबाना आझमी दिल्लीत वाजपेयी यांच्या निवासस्थानी
केरळच्या राज्यपालांनी अटल बिहारी वाजपेयी यांच्या पार्थिवाचे अंत्यदर्शन घेतले