Avimukteshwaranand : अविमुक्तेश्वरानंद यांचं वक्तव्य; “भगवा दहशतवादी असेल तर त्याची काय पूजा करणार का? कुठलाही रंग…”

भगवा दहशतवादी असेल तर त्याची पूजा करणार का?-अविमुक्तेश्वरानंद

“दहशतवादी हा दहशतवादी असतो, भगवा दहशतवादी असेल तर त्याची पूजा करणार का? कुठलाही रंग असो तो दहशतवादी असेल तर तुम्ही त्याची पूजा करणार का? जर भगवा रंग असेल तर अपमान करणार का? रंगाचा काय संबंधच काय? दहशतवाद हा दहशतवाद असतो त्यात रंगाचा काही प्रश्नच येत नाही आणि दहशतवादाच्या विरोधात शून्य सहनशक्तीचं धोरणच अवलंबलं पाहिजे.” असं शंकराचार्य अविमुक्तेश्वरानंद सरस्वती यांनी म्हटलंय.

दोषी आरोपी सापडत कसे नाहीत? अविमुक्तेश्वरानंद यांचा सवाल

शंकराचार्य अविमुक्तेश्वरानंद सरस्वती पुढे म्हणाले, “दहशतवादी येतात आणि स्फोट करुन जातात. त्यातले दोषी कोण ते तुम्हाला शोधता येत नाही. २००६ मध्ये मुंबईत सात साखळी बॉम्बस्फोट झाले त्यातले आरोपी अजूनही शोधता आलेले नाहीत. मालेगाव स्फोट प्रकरणातले आरोपी कोण शोधता आले नाहीत. अपयश लपवण्यासाठी सरळ भगवा दहशतवाद वगैरे गोष्टी करता. दहशतवादाचा कुठला रंग असतो का? रंग आयुष्याचे असतात. मेल्यानंतर तुमचे डोळे रंग पाहू शकत नाहीत. एखाद्या व्यक्तीचा मृत्यू झाला की त्याचा फोटोही रंगीत नसतो, तो कृष्ण धवलच असतो. चित्रपट बघा, फ्लॅशबॅक दाखवण्यासाठी कृष्ण धवल रंगांचा वापर करतात. दहशतवादाचा रंग नसतो. तो रंग काळा, हिरवा, निळा कुठलाच नसतो. दहशतवादात रंग शोधणारे दहशतवादाच्याबाबतीत पक्षपाती आहेत.” असं मला वाटतं असंही परखड विधान अविमुक्तेश्वरानंद यांनी केलं आहे.

हिंदी भाषेबाबत काय म्हणाले अविमुक्तेश्वरानंद?

“हिंदी भाषेला कधी ओळख मिळाली? मराठीला ओळख कधी मिळाली याचा इतिहास पाहिला तर लक्षात येतं की हिंदी भाषेला आपल्या देशात राजभाषा म्हणून आधी ओळख मिळाली आहे. १९६० मध्ये जेव्हा महाराष्ट्र राज्य तयार झालं तेव्हा मराठी भाषेला राज्यभाषा म्हणून ओळख मिळाली” असं शंकराचार्य अविमुक्तेश्वरानंद यांनी म्हटलं आहे.