बहुचर्चित व बहुप्रतिक्षित मुंबई-नागपूर समृद्धी महामार्गाच्या बाजूनेच आता बुलेट ट्रेनही धावण्याची दाट शक्यता आहे. रेल्वे मंत्रालयाची तशी योजना असून यासाठी रेल्वेने केंद्रीय रस्ते वाहतूक मंत्रालयासोबत चर्चा केल्याचीही माहिती आहे. दोन्ही मंत्रालय मिळून या प्रकल्पावर काम करणार आहेत.
हा प्रकल्प यशस्वी झाल्यास दोन वेगवेगळ्या वाहतूक व्यवस्थेसाठी केलेला हा पहिला एकत्रित प्रकल्प ठरेल. मात्र, या प्रकल्पामध्ये भूसंपादन अडचणीचा मुद्दा ठरण्याची शक्यता आहे. समृद्धी महामार्गासाठी भूसंपादन करतानाच बुलेट ट्रेनच्या प्रकल्पाचाही विचार करण्यात येणार असल्याचे रेल्वेच्या सूत्रांनी सांगितले.
मुंबई मेट्रो व दिल्ली-कोलकाता बुलेट ट्रेनसाठीच्या स्पेनच्या इन्को या सल्लागार कंपनीनेच नागपूर-मुंबई बुलेट ट्रेनचा तांत्रिक अभ्यास पूर्ण केला असल्याची माहिती आहे. समृद्धी महामार्गासोबतच या बुलेट ट्रेनसाठीही भूसंपादन करण्याचा विचार असून यासाठी इन्को या कंपनीचे सर्वेक्षणही पूर्ण झाले आहे आणि त्यांचा अहवाल सकारात्मक असल्याची माहिती रेल्वेच्या एका मोठ्या अधिकाऱ्याने वृत्तसंस्था आयएएनसला दिली आहे. सध्या इन्को कंपनीने दिलेल्या अहवालावर रेल्वेच्या अधिकाऱ्यांकडून अभ्यास सुरू आहे.
