भायखळा जेलमध्ये मंजुळा शेट्येसोबत नक्की काय घडलं?; इंद्राणीने केला खुलासा

भायखळा तुरुंगातील वॉर्डन मंजुळा शेट्ये हिच्या मृत्यूनंतर महिला कैद्यांचा उद्रेक झाला होता. हिंसा घडवून आणण्यासाठी कैद्यांना चिथावणी दिल्याच्या आरोपाखाली पोलिसांनी इंद्राणीविरोधात गुन्हा दाखल केला होता. त्यानंतर इंद्राणीनं तुरुंग अधिकाऱ्यांनी आपल्याला मारहाण केल्याचा आरोप केला. विशेष सीबीआय न्यायालयात एका अर्जाद्वारे इंद्राणीने हा आरोप केला होता. न्यायालयानेही त्याची दखल घेतली. मंजुळा हिच्या मृत्यूनंतर महिला कैद्यांना भडकावल्याचा गुन्हा इंद्राणीवर नोंदवण्यात आल्याच्या पार्श्वभूमीवर आपण कारागृहात जाऊन तिची भेट घेतली. सुरुवातीला आपल्याला भेट नाकारण्यात आली. परंतु नंतर इंद्राणीला भेटू देण्यात आले. त्यावेळी कारागृह अधिकाऱ्यांकडून तिलाही मारहाण केल्याची तक्रार तिने आपल्याकडे केली. मारहाणीच्या जखमाही इंद्राणीने आपल्याला दाखवल्या. तिच्या डोक्यावर तसेच हातापायावर जखमा आहेत, असेही इंद्राणीची वकील गुंजन मंगला यांनी तिच्या वतीने अर्ज दाखल करताना न्यायालयाला सांगितले होते. तुरुंग अधीक्षक आणि अन्य अधिकाऱ्यांनी शिवीगाळ केल्याची तसेच मंजुळाच्या मृत्यूचा निषेध केल्याचा सूड म्हणून लैंगिक छळ करण्याची धमकी दिल्याचा आरोपही इंद्राणीने अर्जात केला आहे. हा सगळा प्रकार न्यायालयाच्या निदर्शनास आणून देता यावा आणि तुरुंग अधिकाऱ्यांविरोधात गुन्हा दाखल करता यावा म्हणून तिला न्यायालयासमोर हजर करण्याचे आदेश देण्याचीही गुंजन यांनी न्यायालयाकडे मागणी केली होती. त्याची दखल घेत विशेष सीबीआय न्यायालयाचे न्यायाधीश जे. सी. जगदाळे यांनी इंद्राणीच्या अर्जाची दखल घेतली होती. न्यायालयाने इंद्राणीला बुधवारी न्यायालयासमोर हजर करण्याचे आदेश तुरुंग प्रशासनाला दिले होते.