अनंतनागमध्ये ४९ दिवसांची संचारबंदी अखेर उठवली

काश्मीरच्या अनंतनाग शहरात गेल्या ४९ दिवसांपासून लागू असलेली संचारबंदी उठवण्यात आली आहे. काश्मीर खोऱ्याच्या इतर काही भागांत मात्र संचारबंदी कायम आहे. फुटीरतावाद्यांनी लष्कराच्या बदामीबाग येथील कार्यालयावर मोर्चा नेण्याची योजना आखली होती, त्यामुळे श्रीनगरमध्ये संचारबंदी लागू करण्यात आली आहे. अनंतनाग शहरात आज सकाळपासून संचारबंदी उठवण्यात आली असून, प्रतिबंधात्मक आदेश म्हणजे लोकांनी एकत्र जमवण्यावरची बंदी कायम आहे. पोलिसांनी सांगितले, की दक्षिण काश्मीरमधील अनंतनाग येथे ९ जुलैपासून संचारबंदी उठवण्याची ही पहिलीच वेळ आहे. हिज्बुल मुजाहिद्दीनचा कमांडर बुरहान वानी हा ८ जुलैला चकमकीत मारला गेल्यानंतर तेथे संचारबंदी ९ जुलैपासून लागू केली होती. अधिकाऱ्यांनी सांगितले, की श्रीनगरमध्ये संचारबंदी लागू असून, दक्षिण काश्मीरमधील पुलवामा व पाम्पोर येथीही ती लागू आहे. काश्मीर खोऱ्यात कायदा व सुव्यवस्था राखण्यासाठी प्रतिबंधात्मक आदेश लागू केले आहेत. फुटीरतावाद्यांनी बदामीबाग कॅन्टोन्मेंट येथे लष्कराच्या मुख्यालयावर मोर्चा नेण्याचे ठरवले होते. लागोपाठ पन्नासाव्या दिवशी संचारबंदी, र्निबध, फुटीरतावाद्यांचा बंद यामुळे जनजीवन विस्कळीत होते. दुकाने, खासगी कार्यालये व शैक्षणिक संस्था तसेच पेट्रोल पंप बंद होते. सरकारी कार्यालये व बँकांत उपस्थिती कमी होती. मोबाइल इंटरनेटही खोऱ्यात बंद होते. आउटगोइंग सेवाही बंद होती. फुटीरतावादी गट नागरिकांच्या हत्यांविरोधात आंदोलन करीत आहे. त्यांनी बंदचा कालावधी १ सप्टेंबपर्यंत वाढवला आहे. बुरहान वानी याच्या चकमकीतील मृत्यूनंतर हिंसाचारात दोन पोलिसांसह ६८ जण मारले गेले आहेत. ९ जुलैपासून सुरू असलेल्या हिंसाचारात अनेक लोक जखमीही झाले आहेत.