पीटीआय, नवी दिल्ली दिल्ली जल मंडळातील कथित अनियमिततांशी संबंधित आर्थिक गैरव्यवहाराच्या एका प्रकरणात सक्तवसुली संचालनालयाने (ईडी) बजावलेल्या समन्सनुसार ईडीसमोर हजर होणे दिल्लीचे मुख्यमंत्री अरविंद केजरीवाल यांनी सोमवारी टाळले. आम आदमी पक्षाने या नोटीसचे वर्णन ‘बेकायदेशीर’ असे केले आहे. ईडीने केजरीवाल यांना समन्स बजावून सोमवारी आपल्यापुढे हजर राहण्यास सांगितले होते, मात्र केजरीवाल यांनी त्याकडे दुर्लक्ष केले. केंद्रातील भाजप सरकार ईडीचा वापर केजरीवाल यांना लक्ष्य करण्यासाठी व लोकसभा निवडणुकीत प्रचार करण्यापासून रोखण्यासाठी करत असल्याचा आरोप ‘आप’ने केला.
