माजी परराष्ट्र सचिव रोमेश भंडारी यांचे निधन

माजी परराष्ट्र सचिव आणि उत्तर प्रदेशचे माजी राज्यपाल रोमेश भंडारी यांचे शनिवारी रात्री येथे दीर्घ आजाराने निधन झाले. ते ८५ वर्षांचे होते. त्यांच्यामागे पत्नी व कन्या असा परिवार आहे. भंडारी यांना यकृताच्या कर्करोगाने ग्रासल्यामुळे तीन आठवडय़ांपूर्वी गुरगाव येथील मेदांत रुग्णालयात दाखल करण्यात आले होते.
भंडारी यांनी १९८५-८६ या काळात परराष्ट्र सचिवपदाची जबाबदारी संभाळली होती. याखेरीज, त्रिपुरा व गोवा या राज्यांच्या राज्यपालपदीही ते काही काळ होते. दिल्लीचे नायब राज्यपालपदही त्यांनी संभाळले होते. उत्तर प्रदेशात राष्ट्रपती राजवट लागू झालेली असताना १९९५-९६ मध्ये त्या राज्याच्या राज्यपालपदाची जबाबदारी त्यांच्यावर सोपविण्यात आली होती.