राम मंदिरच्या मुद्द्यावरून प्रवीण तोगडियांचे आजपासून बेमुदत उपोषण

सीमेवर सैनिक सुरक्षित नाहीत. शेतकरी आत्महत्या करत आहेत. आमच्या मुली आमच्या घरातच सुरक्षित नाहीत आणि पंतप्रधान विदेश दौऱ्यावर आहेत, अशी टीका त्यांनी मोदींवर केली.

Pravin Togadia, Valentines Day
प्रवीण तोगडिया
विश्व हिंदू परिषदेचे (विहिंप) माजी अध्यक्ष प्रवीण तोगडिया पदावरून बाजूला गेल्यापासून सरकारविरोधात आक्रमक झाले आहेत. अयोध्येत राम मंदिर उभारण्यासाठी आजपासून (दि.१७ एप्रिल) बेमुदत उपोषण करणार असल्याची घोषणा त्यांनी केली आहे. यावेळी त्यांनी पंतप्रधान नरेंद्र मोदींवर टीकाही केली आहे.

तोगडिया म्हणाले की, विश्व हिंदू परिषदेने म्हटले होते की, एकदा आम्हाला (संघ परिवार) संसदेत बहुमत मिळाले तर आम्ही विधेयक संमत करून राम मंदिर उभारण्याचा मार्ग सुकर करण्यात येईल. परिषदेने लोकांना अयोध्येत कार सेवा करताना प्राण पणाला लावण्याचे आवाहन केले होते. सुमारे ६० लोकांनी आपले प्राण त्यासाठी गमावले होते. गुजरातमधील हजारो लोकांनी यासाठी आपले योगदान दिले होते. या मागणीसाठी मंगळवारपासून मी बेमुदत उपोषण करणार आहे, असे ते म्हणाले.

सीमेवर सैनिक सुरक्षित नाहीत. शेतकरी आत्महत्या करत आहेत. आमच्या मुली आमच्या घरातच सुरक्षित नाहीत आणि पंतप्रधान विदेश दौऱ्यावर आहेत, अशी टीका त्यांनी मोदींवर केली. दरम्यान, तोगडिया यांनी ३२ वर्षे विहिंपचे अध्यक्ष म्हणून काम पाहिलेले आहे. विहिंपच्या नव्या कार्यकारिणीत तोगडिया समर्थकांना स्थान देण्यात आलेले नाही.

तोगडिया यांनी विहिंपचे नवे अध्यक्ष एस. कोकजे यांनाही उपोषणात सहभागी होण्याचा आग्रह केला आहे. कोकजे यांनी उपोषणात सहभाग नोंदवावा आणि संसदेत राम मंदिर निर्मितीसाठी विधेयक आणले जावे, यासाठी दबाव आणण्याची गरज असल्याचे ते म्हणाले.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

Web Title: From today pravin togadia on fast for ram mandir in ayodhya