‘जॉली एलएलबी’ला दिलासा; प्रदर्शनाला स्थगितीस हायकोर्टाचा नकार

अर्शद वारसी आणि बूमन इराणी याची प्रमुख भूमिका असलेला ‘जॉली एलएलबी’ चित्रपटाच्या प्रदर्शनाला स्थगिती देण्यासाठी दाखल करण्यात आलेली जनहित याचिका दिल्ली उच्च न्यायालयाने शुक्रवारी फेटाळली. याचिकाकर्त्याने चित्रपटासंबंधीची संपूर्ण माहिती दिलेली नाही. त्यामुळे याचिका फेटाळण्यात येत असल्याचे न्यायालयाने म्हटले आहे.
जॉली एलएलबीमध्ये वकिलांची बदनामी करण्यात आल्याचा आरोप करीत मेरठमधील वकिलांनी चित्रपटाच्या प्रदर्शनाविरोधात दिल्ली उच्च न्यायालयात धाव घेतली होती. पुढील आठवड्यात हा चित्रपट देशभर प्रदर्शित होतो आहे. या चित्रपटाचे ट्रेलर सध्या विविध वाहिन्यांवर दाखविण्यात येत आहे. त्यामध्ये अर्शद वारसी एका जनहित याचिकेवरील इंग्रजी स्पेलिंगमध्ये चुका करतो. प्रॉसिक्युशन हा शब्द प्रॉस्टिट्यूशन तर अपील हा शब्द ऍपल असा लिहितो. यावरून या चित्रपटात वकिलांची बदनामी करण्यात आल्याचा आरोप करीत वकिलांनी न्यायालयाची पायरी चढण्याचा निर्णय घेतला. चित्रपटाच्या ट्रेलरमधून न्यायालयाचा अवमान झाल्याचाही आरोप वकिलांनी केला आणि तातडीने या चित्रपटाच्या प्रदर्शनाला स्थगिती द्यावी, अशी मागणी केली.
दिल्ली उच्च न्यायालयाचे मुख्य न्यायाधीश डी. मुरुगेसन आणि न्या. व्ही. के. जैन यांच्या खंडपीठाने मात्र वकिलांची मागणी फेटाळून लावत केवळ ट्रेलरवरून चित्रपटाच्या प्रदर्शनाला स्थगिती देता येणार नाही, असा निर्णय दिला आहे.