उमर फयाजच्या हत्येमागे हिजबूल मुजाहिदीनचा हात: जम्मू काश्मीर पोलीस

जम्मू काश्मीरमधील पोलीस महासंचालक जावीद गिलानी यांनी गुरुवारी लेफ्टनंट उमर फयाज हत्या प्रकरणावर भाष्य केले. आम्ही घटनास्थळावरुन इन्सास रायफलमधील दोन काडतूस जप्त केले आहे. काही दिवसांपू्र्वी जम्मूत पोलिसांकडील इन्सास रायफल हिसकावून दहशतवाद्यांनी पळ काढला होता. याच रायफलचा वापर उमर फयाज हत्याप्रकरणात झाला का याची तपासणी सुरु असल्याचे गिलानी यांनी सांगितले. गिलानी यांनी या प्रकरणात अधिक तपशील जाहीर केला नाही. गिलानी म्हणाले, या घटनेत हिजबल मुजाहिदीन मॉड्यूलचा हात दिसत आहे. आम्ही दहशतवाद्यांची ओळख पटवली असून त्यांची नावे तूर्तास जाहीर करणार नाही असे त्यांनी म्हटले आहे. शवविच्छेदन अहवाल अजून उपलब्ध झालेला नाही. पण प्राथमिक माहितीनुसार उमर फयाजच्या अंगावर अत्याचाराच्या खुणा दिसलेल्या नाहीत असे त्यांनी स्पष्ट केले आहे.

कुलगाममध्ये राहणारा २२ वर्षाचा लेफ्टनंट उमर फयाजचा मृतदेह बुधवारी सकाळी शोपियनमध्ये आढळून आला होता. उमर फयाजचे मंगळवारी राहत्या घरातूनच अपहरण करण्यात आले होते. फयाजवर जवळून गोळ्या झाडण्यात आल्या होत्या. वर्षभरापूर्वीच सैन्यात भरती झाला होता. पहिल्यांदाच रजा घेऊन आलेल्या उमर फयाजची ही रजा शेवटची ठरली होती.