प्रत्येक जिल्ह्यात विधानसभेची एक जागा द्या, मुस्लिमांची काँग्रेसकडे मागणी

कर्नाटकमधील मुस्लिम नेत्यांनी प्रत्येक जिल्ह्यामध्ये एक जागा मागितली आहे. कर्नाटक विधानसभा निवडणुकीत काँग्रेसने प्रत्येक जिल्ह्यात एक जागा मुस्लिम उमेदवारांसाठी राखीव ठेवावी अशी मागणी कर्नाटकमधील मुस्लिम नेत्यांच्या गटाने केली आहे. माजी खासदार के. रहमान खान यांच्या नेतृत्वाखाली काँग्रेसमधील मुस्लिम नेत्यांनी नवी दिल्लीत पक्षाच्या केंद्रीय निवडणूक समितीच्या सदस्यांची भेट घेतली व यावेळी मुस्लिमांना जास्तीत जास्त का संधी मिळाली पाहिजे ? ते पटवून देण्याचा प्रयत्न केला.

मुस्लिमांचे प्राबल्य असलेल्या भागांमध्ये मोठया प्रमाणावर मतदान झाले तर ते काँग्रेसच्या पथ्यावर पडेल तसेच ज्या भागातून आमचा उमेदवार निवडून येऊ शकतो अशा मतदारसंघातून आम्ही मुस्लिमांसाठी उमेदवारी मागत आहोत असे के. रहमान यांनी सांगितले. योग्य संधी मिळाली तर २८ जागांवर मुस्लिम उमेदवार निवडून येतील असा त्यांचा दावा आहे.

२०१३ मध्ये काँग्रेसने विविध मतदारसंघातून १९ मुस्लिम उमेदवारांना संधी दिली होती. त्यापैकी १० उमेदवार निवडून आले होते. दलित नेत्यांनी सुद्धा काँग्रेसच्या केंद्रीय निवडणूक समितीशी चर्चा केली. त्यांनी सुद्धा जास्त जागा मागितल्या आहेत.