सिएटलमधील जातिभेदविरोधी अध्यादेश ऐतिहासिक – क्षमा सावंत

अनेक लोकांनी जोरदार विरोध करूनही सिएटल शहराने जातीवर आधारित भेदभावावर घातलेली बंदी हा जगभरातील अत्याचारित जातींचा ‘विलक्षण ऐतिहासिक विजय’ आहे, असे या मुद्दय़ावरील अध्यादेशाच्या प्रणेत्या असलेल्या भारतीय- अमेरिकी राजकीय नेत्या क्षमा सावंत यांनी म्हटले आहे. काही प्रमुख बडय़ा तंत्रज्ञान कंपन्यांमध्ये जातिप्रथा अद्यापही कायम असल्याचा आरोप त्यांनी केला.

जातीवर आधारित भेदभावाच्या धोरणाविरुद्ध क्षमा सावंत यांनी मांडलेला ठराव सिएटलच्या स्थानिक परिषदेने गेल्या आठवडय़ात संमत केला. असे करणारे ते अमेरिकेतील पहिले शहर ठरले. सिएटल सिटी कौन्सिलमध्ये हा ठराव सहा विरुद्ध एक मतांनी मंजूर करण्यात आला.विरोधावर मात : ‘उजव्या विचारांचे हिंदू’ असलेल्या भारतीय- अमेरिकींच्या एका गटाने केलेला जोरदार विरोध, तंत्रज्ञान कंपन्यांचा विरोध आणि डेमॉक्रॅट सदस्यांचे असहकार्य असूनही आपण हे ऐतिहासिक कृत्य करू शकलो, असे राजकीय नेत्या व अर्थतज्ज्ञ असलेल्या सावंत म्हणाल्या.