तेजस्वी यादवांचं उपमुख्यमंत्रीपद जाणार की राहणार सस्पेन्स कायम!

१० जुलैला राजदची एक बैठक झाली होती ज्यामध्ये सीबीआयकडून छापेमारी झाली असली तरीही तेजस्वी यादव उपमुख्यमंत्रीपद सोडणार नाहीत असा निर्णय घेण्यात आला होता. मात्र आता बुधवारी होणाऱ्या बैठकीत हाच निर्णय कायम राहिल की काही बदल होईल हे पाहणं औत्सुक्याचं ठरणार आहे. तीन आठवड्यांपूर्वी तेजस्वी यादव आणि इतर यादव परिवाराच्या बेकायदा मालमत्तेवर सीबीआयनं छापेमारी केली होती. ज्यानंतर जदयू आणि राजद या दोन्ही सत्ताधारी पक्षांचा वाद शिगेला पोहचला होता आणि तेजस्वी यादवांच्या राजीनाम्याची मागणी सातत्यानं होताना दिसते आहे.

अशात आता बुधवारी होणाऱ्या बैठकीत काय होणार हे पाहणं महत्त्वाचं ठरणार आहे. २८ जुलैपासून बिहारमध्ये पावसाळी अधिवेशन सुरू होतं आहे, या अधिवेशनापर्यंत तेजस्वी यादव यांनी राजीनामा दिला नाही तर अधिवेशन चालू देणार नाही असा इशारा भाजपनं दिला आहे. त्यामुळे बुधवारच्या बैठकीत राजदचे आमदार काय निर्णय घेतात त्यावर सगळ्याच नेत्यांचं लक्ष आहे. मुख्यमंत्री नितीशकुमार यांनी तेजस्वी यादव यांचा राजीनामा घ्यावा किंवा त्यांना पदावरून बरखास्त करावं यासाठी भाजप जदयूवर दबाव आणत असल्याचीही चर्चा आहे.

तेजस्वी यादव प्रकरणात नुकतीच नितीशकुमार यांनी काँग्रेस उपाध्यक्ष राहुल गांधी यांची भेट घेतली तसंच ते याप्रकरणी सोनिया गांधींनाही भेटणार आहेत. मात्र असं असलं तरीही उद्या राजदच्या आमदारांची जी बैठक होणार आहे त्यात अनेक गोष्टी स्पष्ट होण्याची शक्यता आहे. तेजस्वी यादव यांनी स्वतःहून राजीनामा दिला नाही तर तेजस्वी यादव त्यांची हकालपट्टी करू शकतात अशीही एक चर्चा रंगताना दिसते आहे.

आमचं सरकार स्थिर आहे, तेजस्वी प्रकरणामुळे आम्हाला काहीही फरक पडणार नाही अशी प्रतिक्रिया नितीशकुमार यांनी दिली आहे. राष्ट्रपतीपदी विराजमान झालेले रामनाथ कोविंद यांना जेडीयूनं पाठिंबा दिला तेव्हापासूनच राजद आणि जदयू यांच्यात वादाची ठिणगी पडली ज्यानंतर हा वाद चांगलाच पेटला आहे. आता बुधवारी होणाऱ्या बैठकीत तेजस्वी यादव यांचं भवितव्य ठरण्याची दाट शक्यता आहे.