Anna University Sexual Assault Case : अण्णा विद्यापीठात शिरून एका विद्यार्थीनीवर लैंगिक अत्याचार करणाऱ्या आरोपीला कमीत कमी ३० वर्षांच्या जन्मठेपेची शिक्षा सुनावण्यात आली आहे. चैन्नईतील महिला न्यायालयाने ही शिक्षा सुनावली आहे. डिसेंबर २०२४ मध्ये ही घटना घडली होती. पाच महिन्यांच्या कालावधीत फास्ट ट्रॅकवर खटला चालवून पीडितेला न्याय देण्यात आला आहे. दरम्यान, याप्रकरणी मोठं आंदोलनही उभं राहिलं होतं.
आरोपी ए ज्ञानशेखरन हा बिर्याणी विक्रेता होता. पण त्याच्या नावावर अनेक गुन्हे दाखल होते. त्यामुळे त्याला जन्मठेपेची शिक्षा सुनावण्यात आली. तसंच, ९० हजारांचा दंडही ठोठावण्यात आला आहे. न्यायाधीश एम राजलक्ष्मी यांनी सांगितले की, दोषीला किमान ३० वर्षे तुरुंगात राहावे लागेल.
१०० पानांचं आरोपपत्र दाखल
ज्ञानशेखरनला लैंगिक अत्याचार, बलात्कार, धमकी देणे आणि अपहरण यासह सर्व ११ आरोपांमध्ये २८ मे रोजी दोषी ठरवले. या प्रकरणात किमान २९ साक्षीदारांनी साक्ष दिली आणि पोलिसांनी १०० पानांचे आरोपपत्र दाखल केले. त्याने आधी कमीत कमी शिक्षेची विनंती केली होती, कारण त्याने त्याच्या वृद्ध आई आणि आठ वर्षांच्या मुलीची काळजी घेण्यासाठी घरी असणे आवश्यक होते. परंतु सर्व आरोपांवरील त्याची शिक्षा लक्षात घेता, त्याला जास्तीत जास्त शिक्षा झाली पाहिजे, असं न्यायाधीशांनी म्हटलं.
ज्ञानशेखरन हा जवळच्या कोट्टूरचा रहिवासी आहे आणि त्याच्यावर याआधी अनेक गुन्ह्यांची नोंद आहे. संपूर्ण खटल्यादरम्यान, त्याने निर्दोष असल्याचा आपला युक्तिवाद कायम ठेवला. परंतु न्यायालयाने पुरावे – फॉरेन्सिक अहवाल, डिजिटल फुटेज आणि प्रत्यक्षदर्शींच्या साक्षीवरून ३० वर्षांची जन्मठेप सुनावली.
दरम्यान, याप्रकरणी संपूर्णपणे वरिष्ठ महिला अधिकाऱ्यांनी बनलेली एसआयटीने तपास केला आणि फेब्रुवारी २०२५ मध्ये सविस्तर आरोपपत्र दाखल केले. त्यानंतर हा खटला महिला न्यायालयात हलवण्यात आला.
