सत्तर वर्षे देशाला लुटणाऱ्यांशी लढण्यास हा चहावाला समर्थ- पंतप्रधान मोदी

उत्तराखंडच्या विकासासाठी येथील नागरिकांनी काँग्रेसला हटवणे गरजेचे आहे. विकासाची गंगा जर येथे आणावयाची असेल तर भाजपशिवाय पर्याय नसल्याचे मत पंतप्रधान नरेंद्र मोदी यांनी केले. उत्तराखंड येथील श्रीनगर येथे विधानसभा निवडणुकीसाठी आयोजित प्रचारसभेत ते बोलत होते.सर्जिकल स्ट्राइकनंतर पाकिस्तानने पुरावे मागण्याआधीच आमच्या लोकांनी त्याचे पुरावे मागितले. आमच्या राजकारण्यांना आमच्या सैनिकांच्या शौर्याचा पुरावा पाहिजे होता का असा सवाल त्यांनी उपस्थित केला. आता वेळ बदलली आहे, दिल्लीमध्ये सरकार बदलले आहे. माझ्या देशातील सैनिक आता वार सहन करणार नाही. तो प्रतिवार करेल, असे त्यांनी विरोधकांना ठणकावले. मी गरीबांसाठी लढणार असल्याचे त्यांनी या वेळी म्हटले. काँग्रेसने उत्तराखंडच्या निर्मितीस विरोध केला होता. मुख्यमंत्री हरीश रावत यांनीही या राज्य निर्मितीला विरोध केला होता, असे सांगत या सरकारने उत्तराखंडच्या या देवभूमीला लूटभूमी बनवले आहे. प्रत्येक ठिकाणी त्यांनी भ्रष्टाचार केला आहे. या राज्याचा पर्यटन विकास करण्याची चांगली संधी असताना या सरकारने त्याकडे दुर्लक्ष केले. त्यामुळे येथील युवकांना हे राज्य सोडून कामाधंद्यासाठी दुसरीकडे जावे लागले, अशी खंत व्यक्त केली. तसेच ७० वर्षे देशाला लुटणाऱ्यांशी लढण्यास हा चहावाला समर्थ असल्याचेही त्यांनी या वेळी म्हटले.