Charlie Kirk : डोनाल्ड ट्रम्प यांचे निकटवर्ती चार्ली कर्क हत्या प्रकरणात मोठी अपडेट; २२ वर्षीय संशयित ताब्यात

चार्ली कर्क यांच्या हत्या प्रकरणात आता मोठी अपडेट समोर आली आहे. गुरुवारी रात्री एफबीआयने या प्रकरणातील संशयिताचे काही फोटो प्रसिद्ध केले होते. तसेच कर्क यांच्या हत्या प्रकरणात वापरण्यात आलेली रायफल देखील एफबीआयने जप्त केली होती. त्यानंतर आता या प्रकरणातील संशयित आरोपीची ओळख पटवण्यास यश आलं असून एका २२ वर्षीय संशयिताला ताब्यात घेण्यात आल्याची माहिती डोनाल्ड ट्रम्प यांनी सांगितली आहे. चार्ली कर्क यांच्या हत्येमागील संशयिताची ओळख टायलर रॉबिन्सन अशी झाली आहे. या संदर्भातील वृत्त न्यू यॉर्क पोस्टने दिलं आहे.

समोर आलेल्या वृत्तानुसार, चार्ली कर्क यांची हत्या केल्यानंतर संशयित फरार झाला होता. मात्र, २२ वर्षीय संशयित आरोपीला त्याच्या वडिलांनीच पोलिसांच्या ताब्यात दिलं आहे. डोनाल्ड ट्रम्प यांनी या संदर्भात एका मुलाखतीत बोलताना प्रतिक्रिया देताना म्हटलं की, “मला खात्रीने वाटतं की संशयित आमच्या ताब्यात आहे. त्याच्या जवळच्याच कोणीतरी व्यक्तीने त्याला ताब्यात दिलं. संशयित आरोपीचे फोटोही समोर आले होते. पण ते फार चांगले आणि परिपूर्ण नव्हते. मला आशा आहे की या प्रकरणातील दोषीला मृत्युदंड मिळेल.”

दरम्यान, एफबीआय आणि अमेरिकेच्या न्याय विभागाने अद्याप संशयिताच्या अटकेबाबत कोणतंही भाष्य केलेलं नाही. पण आतापर्यंत समोर आलेल्या माहितीनुसार, ताब्यात घेण्यात आलेल्या तरुण २२ वर्षीय असून त्याला त्याच्या वडिलांनीच ताब्यात दिलं आहे. या प्रकरणात पुढील तपास सुरू आहे.

चार्ली कर्क कोण होते?

रूढीवादी विचारांची थेटपणे मांडणी करणारे चार्ली कर्क हे डोनाल्ड ट्रम्प यांचे जवळचे सहकारी होते. करोना महामारीबद्दल त्यांनी चुकीची माहिती पसरवली होती, तसेच हवामान बदल असा काही प्रकारच नसल्याचाही त्यांचा दावा होता. सीएनएनच्या वृत्तानुसार, मागच्या वर्षी अमेरिकेत झालेल्या अध्यक्षीय निवडणुकीत कर्क यांच्यामुळे ट्रम्प यांना तरूणांचा मोठा पाठिंबा मिळाला होता. याबद्दल ट्रम्प यांनी त्यांचे जाहीर कौतुक केले होते.

कर्क यांच्या मृत्यूनंतर वृत्तवाहिनीवर बोलत असताना ट्रम्प यांनी चार्ली कर्क देशभक्त असल्याचं म्हटलं होतं. स्वातंत्र्य, लोकशाही, न्याय आणि अभिव्यक्ती स्वातंत्र्याच्या आग्रहामुळे कर्क यांनी लाखो अमेरिकन तरूणांना प्रेरित केलं होतं. त्यांच्या कुटुंबियाप्रती आम्ही संवेदना व्यक्त करतो. तसेच मारेकऱ्यांना शोधून त्यांना योग्य शिक्षा देईपर्यंत आम्ही शांत बसणार नाही, अशी खात्री देतो, असं ट्रम्प यांनी म्हटलं होतं.